அருட்கொடையாய் வந்துதித்த அண்ணல் நபி!

முனைவர் மு. ஜாபர் சாதிக் அலி

- 

இன்று செப்டம்பர் 5, மீலாது நபி தினம். நபிகள் நாயகத்தின் பிறந்த நாளை நினைவுகூர்வதன் மூலம் ஆண்டுதோறும் அவரின் நற்பண்புகளைப் புதிது புதிதாகப் பேசிக்கொண்டிருக்கிறோம். மகான்களின் பிறந்த நாளை ஏன் அவ்வாறு போற்ற வேண்டும்? கொண்டாட வேண்டும்?

அதற்குக் காரணம் இல்லாமல் இல்லை. ஏனெனில், அவர்கள் நம்மை வழிநடத்த வந்த இறைவனின் அருட்கொடை. மண்ணில் பிறக்கும் மனிதரெல்லாம் மாமனிதராய் உயர்தல் அரிது. மனித நேயம் மிளிரும் செயற்கரிய செயல்களைச் செய்தவர்களே மாமனிதராய் உயர்ந்து சிறந்துள்ளார்கள். அவ்வாறு உயர்ந்தவர்களை மனிதரில் மாணிக்கமாய் உலகம் போற்றி மகிழ்கிறது. இஸ்லாம் மார்க்கத்தைத் தொடர்ந்து வழிநடத்தவும் இறைக் கட்டளைகளை மீறிச் சேர்ந்துவிட்ட சமயச் சழக்குகளைக் களைந்திடவும் முகமது நபியை மனிதராய்ப் படைத்து அவர் புகழுக்கு உரியவராக, மக்களாலும் வானவர்களாலும் புகழப்பட வேண்டியவராகவும் வாழ இறைத்தூதராக அறிவித்தான் இறைவன். நாயகமாய் வந்துதித்த நாள் முதல் இறுதிவரை இறைவனுக்குப் பணிந்து, பயந்து தனக்குப் பணிக்கப்பட்ட அனைத்துச் செயல்களையும் இன்முகமாகச் செய்து முடித்தவர் அற்புத அருட்கொடை அண்ணல் நபி (ஸல்).