ஏடிஜிபி ஜெயராமுக்கு எதிரான வழக்கு சிபிசிஐடிக்கு மாற்றம்

கைது உத்தரவையும் ரத்து செய்தது உச்சநீதிமன்றம்

- நமது சிறப்பு நிருபர்

புது தில்லி, ஜூன் 19: தமிழக காவல் துறை ஏடிஜிபி ஜெயராமுக்கு எதிரான ஆள் கடத்தல் வழக்கை மாநில குற்றப் புலனாய்வு சிஐடி வசம் ஒப்படைக்க உச்சநீதிமன்றம் வியாழக்கிழமை உத்தரவிட்டது. மேலும், அவரைக் கைது செய்ய சென்னை உயர்நீதிமன்றம் பிறப்பித்த உத்தரவையும் உச்சநீதிமன்ற நீதிபதிகள் ரத்து செய்தனர்.

மேலும், அவர் தொடர்புடைய வழக்கை சென்னை உயர்நீதிமன்றத்தில் விசாரித்த நீதிபதி வேல்முருகன் அமர்வுக்குப் பதிலாக வேறு அமர்வுக்கு மாற்றுமாறும் உயர்நீதிமன்றத் தலைமை நீதிபதியை உச்சநீதிமன்ற நீதிபதிகள் கேட்டுக்கொண்டனர்.

திருவள்ளூர் மாவட்டத்தில் காதல் ஜோடி தலைமறைவான சம்பவத்தில் அந்த ஆணின் தம்பியைக் கடத்திய விவகாரத்தில் எம்எல்ஏ பூவை ஜெகன்மூர்த்தி, காவல் துறை ஏடிஜிபி ஜெயராமுக்கு தொடர்புள்ளதாக சந்தேகம் எழுந்தது. இந்த விவகாரத்தில் சென்னை உயர்நீதிமன்ற உத்தரவின்படி ஆஜரான ஏடிஜிபி ஜெயராமை கைது செய்ய நீதிமன்றம் உத்தரவிட்டது.