வளரும் துறைகளில் பெண்கள் பங்களிப்பை அதிகரிக்க ரூ.1,185 கோடியில் புதிய திட்டம்

வளர்ந்துவரும் துறைகளில் பெண் பணியாளர்களின் எண்ணிக்கையை அதிகரிக்கும் நோக்கத்துடன் ரூ.1,185 கோடி மதிப்பீட்டில் திட்டம் செயல்படுத்தப்படும் என்று முதல்வர் மு.க.ஸ்டாலின் அறிவித்தார்.

- 

சென்னை, ஜூன் 10:

உலக வங்கியின் சென்னை சர்வதேச வணிக மையத்தை முதல்வர் மு.க.ஸ்டாலின் செவ்வாய்க்கிழமை திறந்து வைத்தார்.

இந்த நிகழ்ச்சியில் அவர் பேசியதாவது: உலக வங்கியுடனான நம்முடைய ஒருங்கிணைப்பானது 1971-ஆம் ஆண்டிலிருந்து தொடர்கிறது.

தமிழ்நாடு ஊட்டச்சத்து திட்டம், வாழ்ந்து காட்டுவோம், தோழி விடுதிகள் திட்டம், தமிழ்நாடு சாலை மேம்பாட்டுத் திட்டம், நீர்வள - நிலவளத் திட்டம் என்று பல்வேறு துறைகளில் உலக வங்கியின் பங்களிப்பு உள்ளது. மிகப் பெரிய கடலோரப் பரப்பை தமிழ்நாடு கொண்டிருப்பதால், பேரிடர் துயர் தணிப்புத் திட்டமும் உலக வங்கியுடன் செயல்படுத்தப்பட்டு வருகிறது. இதுபோன்ற ஏராளமான திட்டங்கள் 1.12 பில்லியன் டாலர் அளவுக்கு செயல்படுத்தப்படுகின்றன.