தேசிய ஜனநாயக கூட்டணியில் அமமுக

பியூஷ் கோயல்-டி.டி.வி.தினகரன் சந்திப்பில் உடன்பாடு

- 

தமிழகத்தில் அதிமுக தலைமையிலான தேசிய ஜனநாயக கூட்டணியில் அமமுக இணைந்தது.

சென்னையில் புதன்கிழமை நடைபெற்ற தமிழக பாஜக தேர்தல் பொறுப்பாளரும், மத்திய அமைச்சருமான பியூஷ் கோயல் மற்றும் அமமுக பொதுச் செயலர் டி.டி.வி. தினகரன் சந்திப்பின்போது கூட்டணி உடன்பாடு எட்டப்பட்டது.

தமிழக சட்டப்பேரவைத் தேர்தல் நெருங்கிவரும் நிலையில், தேசிய ஜனநாயக கூட்டணியை விரிவுபடுத்தும் பணியை அதிமுகவும், பாஜகவும் தீவிரமாக மேற்கொண்டு வருகின்றன. டி.டி.வி. தினகரனை தேசிய ஜனநாயக கூட்டணிக்குள் கொண்டுவந்தால் டெல்டா மற்றும் தென் மாவட்டங்களில் திமுகவுக்கு கடுமையான போட்டியை அளிக்க முடியும் என பாஜக, அதிமுகவில் இரண்டாம் கட்டத் தலைவர்கள் தங்களது கட்சித் தலைமையிடம் தொடர்ந்து அழுத்தம் கொடுத்து வந்தனர்.

டி.டி.வி. தினகரனை பாஜக தேசியத் தலைமை இருமுறை புது தில்லிக்கு அழைத்து மறைமுகமாகப் பேச்சு நடத்தியது. கூட்டணியில் இணைய டி.டி.வி. தினகரனும் ஒப்புக்கொண்ட நிலையில், அமமுக மாவட்டச் செயலர்கள் கூட்டம் சென்னை அடையாறில் புதன்கிழமை காலை நடைபெற்றது.