இந்திய - சீன உறவில் புதிய சிக்கல்கள் கூடாது

சீன பாதுகாப்பு அமைச்சரிடம் ராஜ்நாத் சிங்

- 

கிங்டாவோ, ஜூன் 27: இந்திய-சீன உறவில் நேர்மறையான உத்வேகத்தை பராமரிப்பதுடன், புதிய சிக்கல்கள் எழாமல் தவிர்ப்பது இரு தரப்பின் பொறுப்பு என்று பாதுகாப்புத் துறை அமைச்சர் ராஜ்நாத் சிங் தெரிவித்தார்.

சீன பாதுகாப்புத் துறை அமைச்சர் அட்மிரல் டோங் ஜுன் உடனான சந்திப்பில் அவர் இவ்வாறு வலியுறுத்தினார்.

இந்தியா, சீனா, ரஷியா, பெலாரஸ், பாகிஸ்தான், உஸ்பெகிஸ்தான், தஜிகிஸ்தான் உள்ளிட்ட நாடுகள் அங்கம் வகிக்கும் ஷாங்காய் ஒத்துழைப்பு அமைப்பின் (எஸ்சிஓ) பாதுகாப்பு அமைச்சர்கள் மாநாடு, சீனாவின் துறைமுக நகரான கிங்டாவோவில் வியாழக்கிழமை நடைபெற்றது. இதில் பாதுகாப்புத் துறை அமைச்சர் ராஜ்நாத் சிங் பங்கேற்று, இந்தியாவின் கருத்துகளை முன்வைத்தார்.

மாநாட்டையொட்டி, சீன பாதுகாப்புத் துறை அமைச்சர் அட்மிரல் டோங் ஜுன்னை சந்தித்த அவர், இருதரப்பு பேச்சுவார்த்தையில் ஈடுபட்டார்.

இதுதொடர்பாக ராஜ்நாத் சிங் வெளியிட்ட எக்ஸ் பதிவில், 'சீன பாதுகாப்புத் துறை அமைச்சர் உடனான பேச்சுவார்த்தை ஆக்கபூர்வமாக அமைந்தது. இருதரப்பு உறவுகள் சார்ந்த விவகாரங்களில் எதிர்கால நோக்குடைய கருத்துகள் பகிர்ந்து கொள்ளப்பட்டன. சுமார் 6 ஆண்டுகளுக்கு பிறகு கைலாஷ்-மானசரோவர் யாத்திரை மீண்டும் தொடங்கப்பட்டது குறித்து எனது மகிழ்ச்சியை வெளிப்படுத்தினேன்' என்று குறிப்பிட்டார்.

எல்லை அமைதிக்கான அவசியம்: இந்திய-சீன எல்லையில் அமைதி நிலவுவதன் அவசியம் தொடர்பாக இரு அமைச்சர்களும் விரிவாக விவாதித்ததாக மத்திய அரசு வெளியிட்ட செய்திக் குறிப்பில் தெரிவிக்கப்பட்டது.