பெண்ணின்றி அமையாது உலகு

தன் சுயத்தை அறிதலே பெண்ணியம். தன் பலம் என்ன? பலவீனம் என்ன என்பதை தன்னுள் இருக்கும் துலாக்கோலில் சீர்தூக்கிப் பார்த்து அதற்கேற்றவாறு தன்னை கட்டமைத்துக் கொண்டு தன்னை சீர்பட முன்னேற்றிக் கொள்வதே உண்மையான பெண்ணியம்.

- முனைவர் பவித்ரா நந்தகுமார்

இல்லாத உலக இயக்கத்தை எவரேனும் கற்பனை செய்ய இயலுமா? அப்படி இயங்கினால் எப்படி இருக்கும்? பெண் இல்லாத உலகத்தைப் பற்றி சிந்தித்தபோது அது பாலைவனத்தில் மேற்கொள்ளும் பயணம்போல் கடுமையானதாக இருக்கும் என்றே தோன்றுகிறது. மாறாக, பெண்களோடு இணைந்து வாழும் இந்த வாழ்க்கை ஒரு பூஞ்சோலைக்குள் வசிப்பது போன்ற மனநிறைவைக் கொடுப்பதோடு வாழ்வு பற்றிய புரிதலை புதுப்புது கோணத்தில் கற்றுக் கொடுத்துக் கொண்டே இருக்கிறது என நண்பர் ஒருவர் சொன்னார். உண்மை தானே? ஆணும் பெண்ணும் சரிநிகர் சமமானவர்கள் என்று பலரும் சொல்வார்கள். உண்மையில் இது தவறு. இந்த நிலைப்பாடு கல்வியிலும் சொத்துரிமையிலும் வர வேண்டுமே தவிர, எல்லா நிலைகளிலும் ஏற்றுக் கொள்ள இயலாது. ஏனெனில் இருவரும் வெவ்வேறு விதங்களில் தனித்துவமானவர்கள். ஆண் உடலளவில் வலிமையானவன், பெண் மனதளவில் பலமானவள்.

ஓர் ஆண் ஒரு சமயத்தில் ஒரு வேலையில் மட்டுமே ஆர்வமாக ஈடுபட முடிகின்ற மூளை அமைப்பைக் கொண்டவன். ஆனால், பெண்ணின் மூளை அமைப்பு ஒரு சமயத்தில் பல வேலைகளை முழு ஈடுபாட்டுடன் செய்ய வல்லது. நம் அம்மாக்கள், பாட்டிகள், அக்காக்கள் இவர்களைக் கவனித்திருக்கிறீர்களா? ஒரு பக்கம் அடுப்பில் உலை கொதித்துக் கொண்டிருக்க, பாத்திரம் துலக்கியபடியே மொட்டை மாடியில் காய வைத்திருக்கும் வற்றலை எடுத்து வர வேண்டும், நாளைய படையலுக்கான மளிகைச் சாமான் இருப்பு எவ்வளவு இருக்கும், இரண்டு நாட்களுக்குப் பிறகான பயண ஏற்பாட்டுக்கு என்ன என்ன எடுத்து வைப்பது என அடுத்தடுத்த பணிகளை கணக்குப் போட்டுக் கொண்டிருப்பார்கள். உடலும் அதற்கேற்ப ஓடிக்கொண்டே இருக்கும்.