உத்தரகண்ட்: பனிச்சரிவில் சிக்கிய 32 பேர் மீட்பு

மேலும் 25 தொழிலாளர்களை மீட்க போராட்டம்

- 

டேராடூன், பிப். 28: உத்தரகண்டின் சமோலி மாவட்டத்தில் கடைக்கோடி எல்லை கிராமமான மனாவில் வெள்ளிக்கிழமை ஏற்பட்ட பனிச்சரிவில் எல்லைச் சாலைகள் அமைப்பின் (பிஆர்ஓ) தொழிலாளர்கள் 57 பேர் சிக்கினர். இவர்களில் 32 பேர் காயங்களுடன் மீட்கப்பட்ட நிலையில், கடும் பனிப்பொழிவு மற்றும் பனிச்சரிவு அபாயத்தால் மீதமுள்ள 25 பேரை மீட்கும் பணி சவாலானதாக உள்ளது. மீட்புப்பணி வெள்ளிக்கிழமை இரவில் தற்காலிகமாக நிறுத்திவைக்கப்பட்டது.

உத்தரகண்டில் இந்திய-திபெத் எல்லையையொட்டி 3,200 மீட்டர் உயரத்தில் அமைந்துள்ள கடைக்கோடி கிராமம் மனா. பத்ரிநாத்தில் இருந்து 3 கி.மீ. தொலைவில் உள்ள இப்பகுதியில் கடும் பனிப்பொழிவு நிலவி வருகிறது.