மாணவி பாலியல் வன்கொடுமை: ஞானசேகரன் குற்றவாளி

ஜூன் 2-இல் தண்டனை விவரம் அறிவிப்பு

- 

சென்னை, மே 28: சென்னை அண்ணா பல்கலைக்கழக மாணவி பாலியல் வன்கொடுமை செய்யப்பட்ட வழக்கில், கைது செய்யப்பட்ட ஞானசேகரன் குற்றவாளி என மகளிர் நீதிமன்றம் புதன்கிழமை தீர்ப்பளித்தது. அவருக்கான தண்டனை விவரம் ஜூன் 2-ஆம் தேதி அறிவிக்கப்படும் எனவும் தெரிவித்தது.

தமிழகத்தில் பெரும் அதிர்வலைகளை ஏற்படுத்திய அண்ணா பல்கலைக்கழக மாணவி பாலியல் வன்கொடுமை வழக்கில் சென்னை மகளிர் நீதிமன்றம் புதன்கிழமை காலை 10.30 மணிக்கு தீர்ப்பளித்தது. அப்போது நீதிமன்றத்தில் ஆஜர்படுத்தப்பட்ட ஞானசேகரன் மீது பதிவு செய்யப்பட்ட வழக்குகளின் விவரங்களை நீதிபதி ராஜலட்சுமி அவரிடம் தெரிவித்தார். மேலும் பதிவு செய்யப்பட்டுள்ள 12 சட்டப் பிரிவுகளில் 11 சட்டப் பிரிவுகளின் கீழ் ஞானசேகரன் மீதான குற்றச்சாட்டுகள் அரசுத் தரப்பில் சந்தேகத்துக்கு இடமின்றி நிரூபிக்கப்பட்டுள்ளதாக நீதிபதி எம். ராஜலட்சுமி அறிவித்தார். எனவே, ஞானசேகரன் குற்றவாளி என அவர் தீர்ப்பளித்தார்.