வக்ஃப் மசோதாவுக்கு எதிராக உச்சநீதிமன்றத்தில் காங்கிரஸ், மஜ்லிஸ் கட்சி வழக்கு

நாடாளுமன்றத்தில் நிறைவேற்றப்பட்ட ‘வக்ஃப் சட்டத் திருத்த மசோதா 2025’ -க்கு எதிராக உச்சநீதிமன்றத்தில் காங்கிரஸ், அகில இந்திய மஜ்லிஸ் ஆகிய கட்சிகளின் சார்பில் வெள்ளிக்கிழமை மனுக்கள் தாக்கல் செய்யப்பட்டன.

- 

புது தில்லி, ஏப். 4:

‘வக்ஃப் சொத்துகள், அவற்றின் நிர்வாகத்தின் மீது தன்னிச்சையாக கட்டுப்பாடுகளை திணிக்கும் இம்மசோதா, அரசமைப்புச் சட்டப் பிரிவுகளை மீறுகிறது’ என்று மனுக்களில் குற்றஞ்சாட்டப்பட்டுள்ளது.

வக்ஃப் சொத்துகளின் நிர்வாகத்தை சீரமைக்கும் நோக்கில், கடந்த 1995-ஆம் ஆண்டின் வக்ஃப் சட்டத்தில் திருத்தங்கள் மேற்கொள்ளும் மசோதா, எதிர்க்கட்சிகளின் கடும் எதிர்ப்புக்கு இடையே நாடாளுமன்றத்தில் நிறைவேற்றப்பட்டுள்ளது.

வக்ஃப் வாரியங்களில் முஸ்லிம் அல்லாத உறுப்பினர்கள் நியமனம், குறைந்தபட்சம் 5 ஆண்டுகள் இஸ்லாத்தை பின்பற்றுவோர் மட்டுமே வக்ஃப் சொத்துகளை அர்ப்பணிக்க முடியும் என்பது உள்ளிட்ட அம்சங்களைக் கொண்ட இம்மசோதாவை அரசமைப்புச் சட்டத்தின் கீழ் செல்லாது என்று அறிவிக்கக் கோரி, காங்கிரஸ் எம்.பி. முகமது ஜாவத், மஜ்லிஸ் கட்சித் தலைவர் அஸாதுதீன் ஒவைஸி ஆகியோர் தரப்பில் உச்சநீதிமன்றத்தில் மனுக்கள் தாக்கல் செய்யப்பட்டுள்ளன.