நாட்டின் வளர்ச்சியில் சிஐஎஸ்எஃப் முக்கியப் பங்கு

நாட்டின் வளர்ச்சியில் மத்திய தொழிலக பாதுகாப்புப் படை (சிஐஎஸ்எஃப்) முக்கியப் பங்காற்றி வருவதாக மத்திய உள்துறை அமைச்சர் அமித் ஷா பாராட்டு தெரிவித்தார்.

- 

அரக்கோணம், மார்ச் 7:

ராணிப்பேட்டை மாவட்டம், அரக்கோணத்தை அடுத்த தக்கோலம் அருகே உள்ள மத்திய தொழிலகப் பாதுகாப்புப் படையின் ராஜாதித்ய சோழன் பயிற்சி மையத்தில் சிஐஎஸ்எஃப் 56-ஆவது தொடக்க நாள் விழா வெள்ளிக்கிழமை நடைபெற்றது. இதில், பங்கேற்று மத்திய அமைச்சர் அமித் ஷா பேசியதாவது:

சிஐஎஸ்எஃப் கடந்த 56 ஆண்டுகளில் நாட்டின் வளர்ச்சி, முன்னேற்றம் ஆகியவற்றில் முக்கியப் பங்காற்றி வருகிறது. விமான நிலையங்கள், துறைமுகங்கள், தொழில் துறை வளர்ச்சியுடன் தொடர்புடைய முக்கிய நிறுவனங்களின் பாதுகாப்பை சிஐஎஸ்எஃப் இல்லாமல் கற்பனை செய்துகூடப் பார்க்க முடியாது.

தலைநகர் புது தில்லியில் சிஐஎஸ்எஃப் தொடக்க நாள் விழாவைக் கொண்டாடுவதற்குப் பதிலாக நாட்டின் பல்வேறு பகுதிகளில் இந்த விழாவைக் கொண்டாட 2019-இல் முடிவு செய்யப்பட்டது. அதன்படி இங்கு இந்த விழா நடைபெற்றுள்ளது.