மக்கள் விரோத ஆட்சி நடத்துகிறது மத்திய பாஜக அரசு

முதல்வர் மு.க.ஸ்டாலின் குற்றச்சாட்டு

- 

பாஜக தலைமையிலான மத்திய அரசு மக்கள் விரோத ஆட்சியை நடத்துவதாக முதல்வர் மு.க. ஸ்டாலின் குற்றஞ்சாட்டினார்.

திருநெல்வேலி அரசு மருத்துவக் கல்லூரி மைதானத்தில் அரசு சார்பில் நலத் திட்ட உதவிகள் வழங்கும் விழா ஞாயிற்றுக்கிழமை நடைபெற்றது. இதில், முதல்வர் மு.க. ஸ்டாலின் கலந்துகொண்டு ரூ. 235 கோடியே 94 லட்சம் மதிப்பிலான 33 முடிவுற்ற பணிகளைத் திறந்து வைத்தார். காயிதே மில்லத் நூலகம் உள்ளிட்ட ரூ. 356 கோடியே 59 லட்சம் மதிப்பிலான 11 புதிய திட்டப் பணிகளுக்கு அடிக்கல் நாட்டினார்.

அதைத் தொடர்ந்து, பல்வேறு துறைகளின் சார்பில் 45,477 பயனாளிகளுக்கு 101 கோடியே 49 லட்சம் மதிப்பிலான நலத் திட்ட உதவிகளை வழங்கி முதல்வர் பேசியதாவது:

பொருநை-தமிழரின் பெருமை:

பொருநை அருங்காட்சியகத்தைத் திறந்து வைத்ததில் பெருமிதம் அடைகிறேன். பொருநை - தமிழரின் பெருமை. இந்திய துணைக் கண்டத்தின் வரலாறு இனி தமிழ் நிலத்தில் இருந்துதான் தொடங்கி எழுதப்பட வேண்டும் என்ற நம்முடைய வாதத்துக்கான சான்றுகளை அறிவியல் பூர்வமாக நாம் நிறுவி இருக்கிறோம்.