செங்கோட்டையிலிருந்து பாவூர்சத்திரம் வழியாக சென்னைக்கு தினசரி ரயில் இயக்கப்படுமா?

தென்காசி மாவட்டம் செங்கோட்டையிலிருந்து பாவூர்சத்திரம், அம்பை வழியாக சென்னைக்கு தினசரி ரயில் இயக்கப்படுமா என பயணிகள் எதிர்பார்ப்பில் உள்ளனர்.

- 

தென்காசி, ஜூன் 11:

திருநெல்வேலி-தென்காசி ரயில் வழித்தடமானது மீட்டர் கேஜ் பாதையில் இருந்து அகல ரயில் பாதையாக மாற்றப்பட்டு 13 ஆண்டுகள் நிறைவடைந்துள்ளன. இந்த வழித்தடமானது தென்காசி, திருநெல்வேலி மாவட்டங்களை மட்டுமல்லாது கேரளத்தையும் இணைக்கக்கூடிய மிக முக்கிய ரயில் வழித்தடமாகும். சேரன்மகாதேவி, கல்லிடைக்குறிச்சி, அம்பாசமுத்திரம், கடையம், பாவூர்சத்திரம் என பொதிகை மலை அடிவாரம் வழியாக செல்கிறது.

தொடக்கத்தில் 1904-இல் இருந்து 1927 வரை இந்த வழித்தடத்தில்தான் மிகவும் பிரபலமான கொல்லம் - சென்னை- கொல்லம் மெயில் இயங்கி வந்தது. ஆங்கிலேயர் காலத்தில் அமைக்கப்பட்ட இந்த மீட்டர் கேஜ் வழித்தடத்தில் கொல்லத்தில் இருந்து இரண்டு தினசரி ரயில்கள் சென்னைக்கு இயக்கப்பட்டன.