பதவி விலகாவிட்டால் ஜாமீன் ரத்து

செந்தில் பாலாஜி தனது அமைச்சர் பதவியை ராஜிநாமா செய்யாவிட்டால் ஜாமீன் ரத்து செய்யப்படும் என உச்சநீதிமன்றம் புதன்கிழமை எச்சரிக்கை விடுத்தது.

- நமது சிறப்பு நிருபர்

நமது சிறப்பு நிருபர் புது தில்லி, ஏப். 23:

அமைச்சர் பதவி வேண்டுமா, சுதந்திரமாக (ஜாமீனில்) இருக்க வேண்டுமா என்பதில் எது தேவை என்பதைத் தேர்வு செய்து அவர் தெரிவிக்க வேண்டும் எனவும் உச்சநீதிமன்றம் உத்தரவிட்டது.

செந்தில் பாலாஜிக்கு எதிரான பண முறைகேடு வழக்கில் (பிஎம்எல்ஏ) கடந்த ஆண்டு செப். 26-இல் அவரை உச்சநீதிமன்றம் நிபந்தனை ஜாமீனில் விடுவித்தது. அதை ரத்து செய்யக் கோரி அமலாக்கத் துறை உச்சநீதிமன்றத்தில் மனு தாக்கல் செய்தது.

இந்த மனுவை உச்சநீதிமன்ற நீதிபதிகள் அபய் எஸ். ஓகா, அகஸ்டின் ஜார்ஜ் மாசி அடங்கிய அமர்வு புதன்கிழமை விசாரித்தபோது, மத்திய அரசின் தலைமை வழக்குரைஞர் (சொலிசிடர் ஜெனரல்) துஷார் மேத்தா ஆஜராகி, அமலாக்கத் துறையின் பிரமாணப் பத்திரத்தில் செந்தில் பாலாஜி சாட்சியங்களை எவ்வாறெல்லாம் கலைக்க முற்பட்டார் என விவரிக்கப்பட்டுள்ளது என்று கூறினார்.