அரையிறுதியில் ஜோகோவிச், வாசெராட்

ஷாங்காய் மாஸ்டர்ஸ் ஆடவர் டென்னிஸ் போட்டியில், செர்பியாவின் நோவக் ஜோகோவிச், மொனாகோவின் வாலென்டின் வாசெராட் ஆகியோர் அரையிறுதிச் சுற்றுக்கு வியாழக்கிழமை முன்னேறினர்.

- 

ஒற்றையர் காலிறுதிச்சுற்றில், போட்டித்தரவரிசையில் 4-ஆம் இடத்திலிருக்கும் ஜோகோவிச் 6-3, 7-5 என்ற நேர் செட்களில், பெல்ஜியத்தின் ஜிஸ பெர்க்ஸை சாய்த்தார். இந்த வெற்றியின் மூலமாக, 1000 புள்ளிகள் கொண்ட மாஸ்டர்ஸ் போட்டிகளில் அரையிறுதிக்கு முன்னேறிய மிக வயதான (38) வீரராக அவர் சாதனை படைத்தார்.

ஏற்கெனவே, முந்தைய சுற்றில் ஸ்பெயினின் ஜேமி முனாருக்கு எதிரான ஆட்டத்தின்போது வெப்பம் மற்றும் கால் பிரச்னை ஆகியவற்றால் அவதிப்பட்ட ஜோகோவிச், இந்த ஆட்டத்தின் முதல் செட்டிலும் உடல்ரீதியாக தடுமாற்றம் கண்டார்.

இருந்தபோதும் அதிலிருந்து மீண்டுவந்து, மாஸ்டர்ஸ் போட்டிகளில் 80-ஆவது முறையாக அரையிறுதிக்கு முன்னேறி அசத்தியிருக்கிறார். அதில் அவர், தகுதிச்சுற்று வீரரான வாலென்டின் வாசெராட்டை சந்திக்கிறார்.