பறவைகள் சரணாலய சுற்றுலாத் தலமாகிறதா பனைஏரி?

சேலம் மாவட்டம், பெத்தநாயக்கன்பாளையம் பனைஏரியை சீரமைத்து பறவைகள் சரணாலயம், சிறுவர் பூங்கா, படகுத் துறை உள்ளிட்ட பொழுதுபோக்கு அம்சங்களுடன் சுற்றுலாத் தலமாக மாற்றுவதற்கான சாத்தியக்கூறுகள் குறித்து ஆய்வு செய்து அறிக்கை சமர்ப்பிக்க சுற்றுலாத் துறை உத்தரவிட்டுள்ளதால், இயற்கை ஆர்வலர்கள், பொதுமக்கள் மகிழ்ச்சி அடைந்துள்ளனர்.

- நமது நிருபர்

நமது நிருபர் வாழப்பாடி, ஜூன் 28:

சேலம் மாவட்டத்தின் 2ஆவது பெரிய ஏரியாக பெத்தநாயக்கன்பாளையம் பனைஏரி திகழ்கிறது. 125 ஹெக்டேர் பரப்பளவில் பரந்து விரிந்து காணப்படும் இந்த ஏரியில், 60 மில்லியன் கனஅடி நீரை தேக்கிவைக்க முடியும். இந்த ஏரியில் இருந்து, பெத்தநாயக்கன்பாளையம், ஒட்டப்பட்டி, ஓலப்பாடி, எருமைசமுத்திரம் உள்ளிட்ட சுற்றுப்புற கிராமங்களில் 285 ஹெக்டேர் விளைநிலங்கள் பாசன வசதி பெறுகின்றன. இந்த ஏரி பத்துக்கும் மேற்பட்ட கிராமங்களுக்கு நிலத்தடி நீராதாரமாகவும் விளங்குகிறது.

அருணாச்சலமலையில் உற்பத்தியாகும் வசிஷ்டநதி மற்றும் கல்வராயன் மலையில் உற்பத்தியாகும் கரியக்கோயில் ஆற்றில் மழைக்காலத்தில் வெள்ளப்பெருக்கு ஏற்படும்போதும், வசிஷ்டநதியில் புழுதிக்குட்டையில் கட்டப்பட்டுள்ள ஆனைமடுவு அணை, கரியக்கோயில் ஆற்றில் பாப்பநாயக்கன்பட்டியில் கட்டப்பட்டுள்ள கரியக்கோயில் அணை நிரம்பி உபரிநீர் திறக்கப்படும்போதும், இந்த பனைஏரி நிரம்புகிறது.