நீண்ட கால பிரதமர்: மோடிக்கு குடியரசுத் தலைவர் வாழ்த்து

மக்களால் தேர்வு செய்யப்பட்டு தொடர்ந்து அதிக நாள்கள் பிரதமராக பதவி வகித்தவர் என்ற சாதனையை பிரதமர் மோடி படைத்ததற்கு குடியரசுத் தலைவர் திரௌபதி முர்மு, குடியரசு துணைத் தலைவர் சி.பி. ராதாகிருஷ்ணன் வாழ்த்து தெரிவித்துள்ளனர்.

- 

கடந்த 2014-ஆம் ஆண்டு மக்களவைத் தேர்தலில் பாஜக தலைமையிலான தேசிய ஜனநாயகக் கூட்டணி வென்றதையடுத்து, அதே ஆண்டு மே 26- ஆம் தேதி முதல்முறையாக நாட்டின் பிரதமராக நரேந்திர மோடி பதவி ஏற்றார். இதையடுத்து நடைபெற்ற 2 மக்களவைத் தேர்தல்களிலும் பாஜக கூட்டணி வென்றதையடுத்து, தொடர்ந்து 3-ஆவது முறையாக அவர் பிரதமராக பதவி வகித்து வருகிறார்.

இதற்கு முன்பு, தேர்தலில் வென்று நாட்டின் பிரதமராக தொடர்ந்து 4,398 நாள்கள் ஜவாஹர்லால் நேரு பதவி வகித்ததே சாதனையாக இருந்தது. அதை பிரதமர் மோடி விஞ்சியுள்ளார். இதற்காக அவருக்கு வாழ்த்து தெரிவித்து குடியரசுத் தலைவர் திரௌபதி முர்மு கடிதம் எழுதியுள்ளார். அந்த கடிதத்தில் அவர் தெரிவித்திருப்பதாவது:

இந்தியாவின் மிக நீண்டகாலம் தொடர்ச்சியாக தேர்வு செய்யப்பட்ட பிரதமராக பணியாற்றிய மைல்கல்லை எட்டியதற்கு உங்களுக்கு எனது வாழ்த்துகள். உங்கள் பதவிக்காலத்தில், நாட்டின் அனைத்து துறைகளிலும் பெரும் வியத்தகு மாற்றங்கள் ஏற்பட்டுள்ளது. அனைவருக்கும் பாதுகாப்பு, விவசாயிகளுக்கு அதிகாரம் அளித்தல், நடுத்தர மற்றும் புதிய நடுத்தர வர்க்கத்தினரின் நலன்களை பாதுகாத்தல் ஆகிய அனைத்திலும் உங்களின் அனைவரையும் உள்ளடக்கிய தொலைநோக்கு பார்வையும் செயல்களும் கோடிக்கணக்கான மக்களின் வாழ்க்கை தரத்தை மாற்றியமைத்துள்ளன.