தலைமைத் தகவல் ஆணையராக ராஜ்குமார் கோயல் பதவியேற்பு

இந்தியாவின் புதிய தலைமைத் தகவல் ஆணையராக ஓய்வு பெற்ற ஐஏஎஸ் அதிகாரி ராஜ்குமார் கோயல் திங்கள்கிழமை பதவியேற்றார்.

- 

குடியரசுத் தலைவர் மாளிகையில் நடந்த பதவியேற்பு விழாவில், ராஜ்குமார் கோயலுக்கு குடியரசுத் தலைவர் திரௌபதி முர்மு பதவியேற்பு பிரமாணமும், ரகசிய காப்புப் பிரமாணமும் செய்து வைத்தார்.

இந்நிகழ்வில் குடியரசு துணைத் தலைவர் சி.பி. ராதாகிருஷ்ணன், மத்திய பணியாளர் நலத் துறை இணையமைச்சர் ஜிதேந்திர சிங் உள்ளிட்டோர் பங்கேற்றனர்.

முன்னாள் தலைமைத் தகவல் ஆணையர் ஹீராலால் சமாரியா கடந்த செப். 3-ஆம் தேதி ஓய்வு பெற்றதைத் தொடர்ந்து, அப்பதவி காலியானது. இந்நிலையில், புதிய தலைமைத் தகவல் ஆணையர் மற்றும் தகவல் ஆணையர்களைத் தேர்ந்தெடுப்பதற்காக பிரதமர் மோடி தலைமையில் அண்மையில் கூட்டம் நடைபெற்றது.