இந்திய கம்யூனிஸ்ட் பொதுச் செயலராக டி.ராஜா மீண்டும் தேர்வு

இந்திய கம்யூனிஸ்ட் கட்சியின் தேசிய பொதுச் செயலராக டி.ராஜா (76) வியாழக்கிழமை மீண்டும் தேர்வு செய்யப்பட்டார்.

- 

பஞ்சாப் மற்றும் ஹரியானா தலைநகரான சண்டீகரில், இந்திய கம்யூனிஸ்ட் கட்சியின் 25-ஆவது தேசிய மாநாடு செப். 21 முதல் செப். 25-ஆம் தேதி வரை நடைபெற்றது. இந்திய கம்யூனிஸ்ட் கட்சி தொடங்கப்பட்டு 100 ஆண்டுகள் நிறைவுடையவுள்ள நிலையில், இந்த மாநாடு நடைபெற்றது. இதில் நாடு முழுவதிலும் இருந்து அக்கட்சியைச் சேர்ந்த 800-க்கும் மேற்பட்டோர் பங்கேற்றனர். இந்த மாநாட்டில் கட்சியின் பொதுச் செயலராக டி.ராஜா மீண்டும் தேர்வு செய்யப்பட்டார்.

அக்கட்சியின் தலைமைப் பொறுப்புகளில் இருப்பவர்கள் 75 வயதைத் தாண்டியிருக்கக் கூடாது என்று விதிக்கப்பட்டுள்ள வரம்பைப் பின்பற்றி, பொதுச் செயலராக அவரை மீண்டும் தேர்வு செய்ய வேண்டாம் என்று சில ஆட்சேபணைகள் எழுந்தன. அதை மீறி மாநாட்டில், பொதுச் செயலராக டி.ராஜா மீண்டும் தேர்வு செய்யப்பட்டார்.