ஜி7 மாநாடு: கனடாவில் பிரதமர் மோடி

ஜி7 உச்சி மாநாட்டில் பங்கேற்க பிரதமர் நரேந்திர மோடி கனடா வந்தடைந்தார்.

- 

கேல்கரி, ஜூன் 17: ஜி7 உச்சி மாநாட்டில் பங்கேற்க பிரதமர் நரேந்திர மோடி கனடா வந்தடைந்தார். இம்மாநாட்டில் உரையாற்றுவதுடன், பல்வேறு நாடுகளின் தலைவர்களையும் அவர் சந்தித்துப் பேசவுள்ளார். சைப்ரஸ், கனடா, குரோஷியா ஆகிய மூன்று நாடுகளுக்கான 5 நாள்கள் அரசுமுறைப் பயணத்தை பிரதமர் மோடி கடந்த ஞாயிற்றுக்கிழமை தொடங்கினார். முதல்கட்டமாக, மத்திய தரைக் கடலில் அமைந்துள்ள தீவு நாடான சைப்ரஸுக்கு சென்ற அவர், அதிபர் நிகோஸ் கிறிஸ்டோடௌலிடிஸுடன் இருதரப்பு பேச்சுவார்த்தை மேற்கொண்டார். இப்பயணத்தின் மூலம் கடந்த 20 ஆண்டுகளில் சைப்ரஸ் சென்ற முதல் இந்தியப் பிரதமர் என்ற சிறப்பு மோடிக்கு கிடைத்தது.

சைப்ரஸைத் தொடர்ந்து, கனடாவுக்கு பிரதமர் மோடி திங்கள்கிழமை மாலையில் (உள்ளூர் நேரம்) வந்தடைந்தார். ஆல்பர்ட்டா மாகாணம், கனனாஸ்கிஸ் நகரில் ஜி7 உச்சிமாநாடு நடைபெற்ற நிலையில், கேல்கரி நகர விமான நிலையத்தில் வந்திறங்கிய அவருக்கு உற்சாக வரவேற்பு அளிக்கப்பட்டது.