தமிழகம் முழுவதும் 10,000 சேவை முகாம்கள்

முதல்வர் மு.க. ஸ்டாலின் அறிவிப்பு

- 

தஞ்சாவூர், ஜூன் 16: அரசின் சேவைகளை மக்கள் தங்கள் பகுதியிலேயே பெறும் வகையில் ஜூலை 15-ஆம் தேதி முதல் தமிழ்நாடு முழுவதும் 10,000 முகாம்கள் நடத்தப்படும் என முதல்வர் மு.க.ஸ்டாலின் திங்கள்கிழமை அறிவித்தார்.

தஞ்சாவூரில் திங்கள்கிழமை நடைபெற்ற அரசு விழாவில் மொத்தம் ரூ. 1,194 கோடி மதிப்பில் 2,461 முடிவுற்ற பணிகளைத் திறந்துவைத்தும், 4,127 புதிய திட்டப் பணிகளுக்கு அடிக்கல் நாட்டியும், 2.25 லட்சம் பயனாளிகளுக்கு நலத் திட்ட உதவிகளை வழங்கியும் அவர் மேலும் பேசியதாவது:

கடந்த 2021 - 22-ஆம் ஆண்டு முதல் 4 ஆண்டுகளில் டெல்டா மாவட்டங்களுக்கு குறுவை சிறப்புத் தொகுப்புத் திட்டம் ரூ. 276.84 கோடி ஒதுக்கீட்டில் செயல்படுத்தப்பட்டது. இதே போல, நிகழாண்டும் டெல்டா மாவட்டங்களுக்கான குறுவை சிறப்புத் தொகுப்புத் திட்டத்துக்கு ரூ. 82.77 கோடி ஒதுக்கீடு செய்யப்படும்.