கொள்முதல் செய்த நெல்லுக்கான தொகை விவசாயிகளுக்கு விரைந்து கிடைக்க நடவடிக்கை தேவை

கொள்முதல் செய்யப்பட்ட நெல்லுக்கான தொகை விவசாயிகளுக்கு விரைந்து கிடைப்பதற்கு அரசு நடவடிக்கை எடுக்க வேண்டும் என்றும், இல்லாவிடில் உணவுத் துறை அமைச்சர் அர. சக்கரபாணிக்கு எதிராக கருப்புக் கொடி ஆர்ப்பாட்டம் நடத்தப்படும் என்றும் தமிழ்நாடு அனைத்து விவசாய சங்கங்கள் ஒருங்கிணைப்புக் குழுத் தலைவர் பி.ஆர். பாண்டியன் தெரிவித்தார்.

- 

மதுரை, மே 29:

மதுரையில் அவர் செய்தியாளர்களிடம் வியாழக்கிழமை கூறியதாவது: தமிழகத்தில் பெரும்பாலான மாவட்டங்களில் வட்டார வேளாண் உதவி இயக்குநர் பணியிடங்கள் காலியாக உள்ளன. குறிப்பாக, திருவாரூர் மாவட்டத்தில் 10 வட்டார வேளாண் உதவி இயக்குநர்கள் பணியில் இருக்க வேண்டும். ஆனால், ஒருவர் மட்டுமே பணியாற்றி வருகிறார். இந்த நிலையில், தமிழக முதல்வர் மு.க.ஸ்டாலின் தொடங்கிவைத்த 'உழவரைத் தேடித் திட்டம்' விவசாயிகளுக்கு முழுமையாகச் சென்றடைவதில் சிக்கல் ஏற்படும். இந்தத் திட்டம் விவசாயிகளுக்கு எதிரான சட்டங்களையும், திட்டங்களையும் திசை திருப்பும் செயலாகவே உள்ளது. தமிழக அரசு நிறைவேற்றிய நில ஒருங்கிணைப்புச் சட்டம் 2023 மூலம் விளைநிலங்கள், ஏரிகள், கால்வாய்கள் உள்ளிட்ட நீர்நிலைகளை பெரு நிறுவனங்கள் அபகரிக்கும் வகையில் அமைந்துள்ளது. நிலம் தர மறுக்கும் விவசாயிகள் குண்டர் சட்டத்தின் கீழ் கைது செய்யப்படுவது கண்டிக்கத்தக்கது.