திருச்சியில் உலக இஸ்லாமிய தமிழ் இலக்கிய 9-ஆவது மாநாடு நாளை தொடக்கம்

இஸ்லாமிய இலக்கியக் கழகத்தின் சார்பில் இணைப்பே இலக்கியம் எனும் கருப்பொருளை உள்ளடக்கி உலக இஸ்லாமியத் தமிழ் இலக்கிய 9-ஆவது மாநாடு திருச்சியில் வெள்ளிக்கிழமை தொடங்கி 3 நாள்கள் நடைபெறுகிறது.

- 

திருச்சி, மே 7:

இதுதொடர்பாக இஸ்லாமிய இலக்கியக் கழகத் தலைவர் சேமுமு. முகமதலி திருச்சியில் புதன்கிழமை கூறியதாவது:

1973 ஆம் ஆண்டு திருச்சியில் வைத்துத் தொடங்கப்பட்ட இஸ்லாமிய இலக்கியக் கழகம் ஒரு பன்னாட்டு அமைப்பு ஆகும். தற்போது 50 ஆண்டுகள் கடந்து விட்ட நிலையில், பொன்விழா மாநாடாக திருச்சி எம்ஐஇடி கல்லூரியில் நடைபெறுகிறது.

இஸ்லாமிய இலக்கியங்கள் என்றாலே ஓரிரு நூல்கள் தான் உள்ளன என்று அறியப்பட்டிருந்த புரிதலை முற்றிலுமாக மாற்றி, இரண்டாயிரத்துக்கும் மேற்பட்ட இலக்கிய நூல்களை தமிழ் உலகிற்கு அறிமுகப்படுத்திய பெருமை இஸ்லாமிய இலக்கியக் கழகத்தையே சாரும். பல்வேறு பல்கலைக்கழகங்களில் இருக்கைகள், அறக்கட்டளைகள் நிறுவவும், சமய நல்லிணக்கத்தை வளர்க்கவும், மனித நேயத்தை தழைக்க செய்யவும் இஸ்லாமிய இலக்கியக் கழகம் தொடர்ந்து பாடுபடுகிறது.

9-ஆவது மாநாட்டின் கொள்கை முழக்கம்கூட இணைப்பே இலக்கியம் என்பதுதான். மனிதர்களை இணைப்பது, மத நல்லிணக்கத்தை வளர்ப்பது, மானுடத்தை தழைத்தோங்கச் செய்வது, சமூக நீதியை நிலைநாட்டுவது ஆகியவற்றை உள்ளடக்கிய மாநாடாக நடைபெறவுள்ளது.