அகமதாபாத் விமான விபத்து தொடர்பான மனு: விசாரிக்க உச்சநீதிமன்றம் ஒப்புதல்

அகமதாபாத் விமான விபத்து தொடர்பான அரசு விசாரணை குடிமக்களின் வாழ்வதற்கான அடிப்படை உரிமை மற்றும் உண்மையான தகவலை அறிவதற்கான உரிமைகளை மீறுவதாக உள்ளதாகப் புகார் தெரிவித்து தாக்கல் செய்த மனுவை விசாரிக்க உச்சநீதிமன்றம் புதன்கிழமை ஒப்புக்கொண்டது.

- 

குஜராத்திலிருந்து லண்டன் நோக்கி கடந்த ஆண்டு ஜூன் 12-ஆம் தேதி புறப்பட்ட ஏர் இந்தியா நிறுவனத்தின் 'போயிங் 787' விமானம் தொழில்நுட்பக் கோளாறு காரணமாக விமான நிலையத்தின் அருகில் இருந்த மருத்துவக் கல்லூரி மாணவர் விடுதியில் மோதி நொறுங்கியது. அதில் பயணித்த குஜராத் முன்னாள் முதல்வர் விஜய் ரூபானி உள்பட மற்ற 241 பேர் மற்றும் பொதுமக்கள் உள்பட 260 பேர் உயிரிழந்தனர்.

இந்த விபத்து தொடர்பாக விசாரணை மேற்கொண்ட விமான விபத்து புலனாய்வு அமைப்பு, தனது முதல்கட்ட விசாரணை அறிக்கையை அண்மையில் தாக்கல் செய்தது. அதில், விமானம் புறப்பட்ட சிறிது நேரத்தில் என்ஜின் 1 மற்றும் 2-இன் எரிபொருள் கட்-ஆஃப் சுவிட்சுகள், ஒன்றன் பின் ஒன்றாக 'ஆஃப்' நிலைக்கு மாறியுள்ளன. இதை ஏன் கட்-ஆஃப் செய்தீர்கள் என ஒரு விமானி மற்றொரு விமானியிடம் கேட்பதும், அதற்கு நான் செய்யவில்லை என அவர் பதிலளிப்பதும் விமானி அறை (காக்பிட்) குரல் பதிவில் பதிவாகியுள்ளதாகத் தெரிவிக்கப்பட்டது.