அதிமுக - பாஜக கூட்டணியை வீழ்த்த திமுக கூட்டணிக்கே வலிமை

கும்பகோணம் மாநாட்டில் முதல்வர் மு.க. ஸ்டாலின் பேச்சு

- 

அதிமுக-பாஜக கூட்டணியை வீழ்த்தும் வலிமை திமுக தலைமையிலான மதச்சார்பற்ற முற்போக்கு கூட்டணிக்கு மட்டுமே உள்ளது என்றார் முதல்வர் மு.க. ஸ்டாலின்.

இந்திய யூனியன் முஸ்லிம் லீக் சார்பில் புதன்கிழமை மாலை தஞ்சாவூர் மாவட்டம், கும்பகோணம் அருகே தாராசுரம் புறவழிச்சாலை மைதானத்தில் நடைபெற்ற மஹல்லா ஜமாஅத் ஒருங்கிணைப்பு மாநில மாநாட்டில் அவர் பேசியதாவது:

நம் நாட்டில் இஸ்லாமியர்கள் எப்படிப்பட்ட அச்சுறுத்தலை எதிர்கொள்கின்றனர் என்பது உலகுக்கே தெரியும். இச்சூழ்நிலையில் இஸ்லாமியர்களுக்கு பாதுகாப்பான ஒரே மாநிலம் தமிழ்நாடுதான். அதற்கு காரணமான திமுகதான் சிறுபான்மையின மக்களைக் காக்கக் கூடிய காவல் அரணாக உள்ளது. அதனால், உணவு அரசியல், கும்பல் வன்முறை போன்றவை தலையெடுக்காமல் இருக்கின்றன. இந்த அமைதிச் சூழ்நிலை சிலரது கண்களை உறுத்துகிறது. தமிழ்நாட்டில் எப்படியாவது குழப்பத்தை ஏற்படுத்துவதற்காக அவர்கள் போடும் ராஜ தந்திரங்கள் அனைத்தும் வீணாகிவிடுகின்றன.