கற்கத் தடம் அறிவோம்!

கட்-ஆஃப் மதிப்பெண் குறைந்துபோனால், கலந்தாய்வு வரை காத்திருக்க பயம்; தங்களுக்குப் பிடித்தமான தனியார் பொறியியல் கல்லூரிகளில் சேர்க்கை வாங்கி விடுகிறார்கள். அந்த கட்-ஆஃப் மதிப்பெண்ணுக்கு கலந்தாய்வில் நல்ல கல்லூரி கிடைக்கும் என்று எவ்வளவு எடுத்துச் சொன்னாலும் கேட்காமல் நிர்வாக ஒதுக்கீட்டில் சேர்க்கை பெறத் துடிக்கிறார்கள்.

- 

பிளஸ் 2 வகுப்பு முடித்த மாணவர்களுக்கு வழிகாட்டும் வகையில், தமிழ்நாடு அரசு, பொது நூலக இயக்ககம் மற்றும் சென்னை மாவட்ட நூலக ஆணைக்குழு இணைந்து கல்லூரி மற்றும் பல்கலைக்கழக மாணவர்களுக்கான மாபெரும் கோடைக்காலப் பயிற்சியை நடத்தியது.

நிகழ்வில் ‘உயர் கல்வியில் புதிய வாய்ப்புகளும், அரசின் திட்டங்களும்’ என்ற தலைப்பில் உரைகள் நிகழ்த்தப்பட்டன. திக்குத்தெரியாமல் தவிக்கும் மாணவர்கள் பயனடைய வேண்டும் என்ற நோக்கத்துடன் இந்நிகழ்ச்சி நடத்தப்பட்டது.

பிளஸ் 2 முடித்த மாணவர்கள் தங்கள் எதிர்காலம் குறித்த தெளிவைப் பெறவேண்டும். இவர்களில் கிராமப்புற மாணவர்கள் தகுந்த வழிகாட்டுதல் இன்றி தவித்துப்போகிறார்கள். ‘என்ன படிக்கலாம்?’ என்ற வழிகாட்டு நிகழ்ச்சிகள் அவர்களுக்காக நடத்தப்படுகின்றன.

கல்லூரிகள், அரங்குகள் அமைத்து மாணவர்களுக்கு வழிகாட்டின. யூடியூப் சேனல்களில் கல்வியாளர்கள் பேசுகிறார்கள். உயர் கல்வி நிறுவனங்களில் சேர்க்கை நடைபெறுவது எப்படி?, அவர்கள் எழுத வேண்டிய நுழைவுத் தேர்வுகள், வேலை வாய்ப்பை அள்ளித்தரும் துறைகள் என்ன என்பது குறித்தும், மாணவர்கள் வளர்த்துக்கொள்ள வேண்டிய திறன்கள், கல்வி உதவித்தொகை பெறும் முறைகள் என்று பல பயனுள்ள ஆலோசனைகள் வழங்கப்பட்டுக்கொண்டேதான் இருக்கின்றன.

பிளஸ் 2 பொதுத்தேர்வு முடிவுகள் வெளியானவுடன் உயர் கல்விக்கு வழிகாட்டும் வகையில் 14417 என்ற தகவல் மைய எண் அறிவிக்கப்பட்டது. கல்லூரிக்கு விண்ணப்பிக்கும் முறை, கல்விக் கட்டணம், உதவித் தொகை போன்றவை குறித்து வழிகாட்டுதல் பெறலாம். இது பள்ளிக் கல்வித் துறையின் சிறந்த முன்னெடுப்பாகும்.

நகர்ப்புறத்தில் உள்ள படித்த பெற்றோர் கல்லூரியின் உள்கட்டமைப்பு, கல்லூரியின் தரம், வேலைவாய்ப்பு, மாநில அளவில் கல்லூரியின் ரேங்கிங் ஆகிய பலவற்றையும் சீர்தூக்கிப் பார்த்து தங்கள் வாரிசுகளை சேர்க்கிறார்கள். பெண்கள் என்றால் விடுதிப் பாதுகாப்பை உறுதி செய்துகொள்கிறார்கள். தேர்வு முடிவுகள் வெளிவருவதற்கு முன்பே கல்லூரியைத் தேர்ந்தெடுத்து வைத்துக்கொள்கிறார்கள்.