கற்றல்திறன் குறைபாடு கல்வியும், மருத்துவமும்!

‘குழந்தைகள் ஆசீர்வாதம் செய்யப்பட்டவர்கள்’ என்பது நல்லோர் வாக்கு. ஆனால் குழந்தைகளிலேயே மனநலம் குறைந்தவர்கள், கற்றல் திறன்பாடு குறைவாக உள்ளவர்கள், ஆட்டிசம் பாதிப்பு உள்ளவர்கள், மாற்றுத்திறனாளிகள் எனப் பல்வேறு குறைபாடு உள்ளவர்கள் இருப்பது வருத்தத்தை அளிக்கிறது. அவர்கள் நிலை மேம்படவேண்டும். அதற்கு என்ன செய்ய வேண்டும்? குறைபாடு உள்ள குழந்தைகளுக்கு தேவையானவை எவை?

- ஏ.எஸ். பிலால்

இந்தியாவில் உள்ள கல்வி அமைப்பு மனப்பாடம் செய்து மதிப்பெண் எடுக்கக்கூடிய வகையிலான கல்வியாக உள்ளது. இதனால், உண்மையான அறிவுத்திறன் மேம்படுகிறதா என்பது யோசிக்க வேண்டிய விஷயமே. பின்லாந்து, கியூபா போன்ற கல்வியில் முன்னேறிய நாடுகளில் கல்விமுறை அறிவுத்திறனை மேம்படுத்துவதாக இருக்கிறது. நமது நாட்டைப் போன்று மனப்பாடம்செய்து மதிப்பெண் எடுக்கக் கூடிய கல்விமுறை அங்கில்லை. அதனால்தான், இந்தியாவில் கண்டுபிடிப்புகள் குறைவாக இருக்கின்றன. நமது கல்விமுறையின்கீழ் படித்துவிட்டு பலர் வெளிநாடுகளில் வேலை செய்கின்றனர்; உயர் பதவிகளில் இருக்கின்றனர்.

ஆனால், வாழ்க்கைக்குத் தேவையான பல புதிய கண்டுபிடிப்புகள் எல்லாம் பல முன்னேறிய நாடுகளிலேயே கண்டுபிடிக்கப்படுகின்றன. ஏன்?

கல்விமுறை மாணவர்களுக்கு சுயமான சிந்தனையைத் தருவதில்லை. எந்தவொரு விஷயத்தைப் பற்றியும் ஆழமான புரிதல்களைத் தருவதில்லை. அதன் அடிப்படைகளைக் கற்றுத் தருவதில்லை. பாடப்புத்தகப் படிப்பின் கூடவே, செயல்முறையிலான படிப்பும் இருந்தால்தான், மனித அறிவின் வளர்ச்சிக்கு அது உதவும். எதையும் தெளிவாகப் புரிந்துகொண்டு அதன் அடிப்படையில் புதியனவற்றைப் படைக்க முடியும். கண்டுபிடிப்புகளை நிகழ்த்த முடியும்.