இலக்கியச் செல்வர் - நெஞ்சம் நிறைந்த நினைவுகள்!

முதல்கை நண்பரும் இலக்கியச் செல்வருமான குமரி அனந்தனும் நானும் கடந்த காலத்தில் தோளோடு தோள் இணைந்து பெருந்தலைவர் காமராசரின் நிழலில் தொண்டாற்றிய அந்த நாள்கள் எங்கள் வாழ்க்கையின் பொன்னான நாள்களாகும்.

- 

மதுரையில் உள்ள வெற்றிப் பயிற்சி கல்லூரியில் அவர் பணியாற்றி வந்தார். நானும், அவரும் அப்போது நண்பர்களானோம். இலக்கியக் கூட்டங்கள், பட்டிமன்றங்கள் போன்றவற்றில் கலந்துகொண்டோம். அரசியலில் அவர் காங்கிரசுக் கட்சியில் இருந்தார். நான் அண்ணன் ஈ.வெ.கி. சம்பத் நடத்திய தமிழ்த் தேசிய கட்சியின் மாவட்ட அமைப்பாளராக இருந்தேன். கட்சி வேறுபாடுகளுக்கப்பால் எங்கள் நட்பு தொடர்ந்தது.

புவனேஸ்வரத்தில் நடைபெற்ற காங்கிரஸ் மாநாட்டில் சோஷலிச கருத்துடையவர்கள் அனைவரும் காங்கிரஸில் வந்து இணையுமாறு காமராசர் விடுத்த அழைப்பினை ஏற்றுத் தமிழ்த் தேசிய கட்சியைக் காங்கிரஸுடன் ஈ.வெ.கி. சம்பத் இணைத்தார். எங்கள் நட்பு இன்னும் நெருக்கமாயிற்று.

1965-ஆம் ஆண்டு டிசம்பர் 15-ஆம் நாள் அன்று சென்னையில் கூடிய தமிழ்நாடு காங்கிரஸ் செயற்குழு அவரை தமிழக இளைஞர் காங்கிரஸ் அமைப்பாளராகத் தேர்ந்தெடுத்தது. மதுரை மாவட்ட இளைஞர் காங்கிரஸ் அமைப்பாளராக நான் தேர்ந்தெடுக்கப்பட்டேன். அவரின் தலைமையில் இளைஞர் காங்கிரஸ் இயக்கம் தீவிரமாக பணியாற்றியது.

1968-ஆம் ஆண்டு காமராசர் சோவியத் நாடு சென்று திரும்பியதையொட்டி அவரை வரவேற்கும் வகையில் மாவட்டந்தோறும் இளைஞர் காங்கிரஸ் பேரணிகளை நடத்துவதென முடிவு செய்து அதற்கான பணிகளில் ஈடுபட்டோம். அனைத்து மாவட்டங்களிலும் இளைஞர் காங்கிரஸ் பேரணிகள் மிகப் பெரிய அளவில் நடத்தப்பட்டன.

1967-ஆம் ஆண்டு காந்தியடிகள் பிறந்த அக்டோபர் 2-ஆம் நாள் முதல் பண்டித நேரு பிறந்த நவம்பர் 14-ஆம் நாள் வரை 44 நாள்களுக்குக் குமரி முனையில் தொடங்கி சென்னை வரை 625 கல் தொலைவில் குமரி அனந்தன் தலைமையில் 100 இளைஞர்கள் காந்திய நெறி நடைப்பயணம் தொடங்கினர்.

குமரி அனந்தன் தலைமையில் நடைபெற்ற அறநெறிப் பயணம் தமிழ்நாட்டு இளைஞர்களுக்குப் புத்துணர்வை ஊட்டியது.

1966-ஆம் ஆண்டு ஜூன் 20 முதல் 10 நாள்கள் மத்தியப் பிரதேசத்தில் உள்ள பச்மாரி என்னும் மலை நகரில் இளைஞர் காங்கிரஸ் பயிற்சி முகாம் ஒன்று அகில இந்திய அளவில் நடத்தப்பட்டது.

தமிழ்நாட்டிலிருந்து குமரி அனந்தன், முதுகுளத்தூர் சோ. பாலகிருட்டிணன், சென்னையைச் சேர்ந்த கேசவ மணி ஆகியோருடன் நானும் அந்த முகாமில் கலந்து கொண்டேன்.