வாக்குப் பதிவு, வாக்கு எண்ணிக்கை விவரங்களை உடனுக்குடன் அறிய புதிய செயலி

தலைமைத் தேர்தல் ஆணையர்

- 

வாக்குப் பதிவு, வாக்கு எண்ணிக்கை விவரங்களை உடனுக்குடன் அறிய புதிய செயலி அறிமுகப்படுத்தப்பட்டுள்ளதாக இந்திய தலைமைத் தேர்தல் ஆணையர் ஞானேஷ் குமார் வெள்ளிக்கிழமை தெரிவித்தார்.

தமிழக சட்டப்பேரவைத் தேர்தலுக்கான ஏற்பாடுகளை ஆய்வு செய்வதற்கான பணிகளை தலைமைத் தேர்தல் ஆணையர் ஞானேஷ் குமார் தலைமையிலான குழுவினர் சென்னையில் வியாழன், வெள்ளி இரு நாள்கள் மேற்கொண்டனர்.

ஆய்வுப் பணிகள் நிறைவடைந்ததையடுத்து, தலைமைத் தேர்தல் ஆணையர் ஞானேஷ் குமார் செய்தியாளர்களிடம் கூறியதாவது: விரைவில் தமிழ்நாட்டில் சட்டப்பேரவைத் தேர்தல் நடைபெற உள்ளது. தேர்தல் திருவிழா, தமிழ்நாட்டின் பெருவிழா. எனவே, தமிழக வாக்காளர்கள் அனைவரும் இந்தத் திருவிழாவில் பங்கேற்க வேண்டும்.

1,000 ஆண்டுகளுக்கு முன்பே ஜனநாயக நடைமுறையைக் கொண்டிருந்தது தமிழ்நாடு. இந்திய தேர்தல் ஆணையம் அண்மையில் நடத்திய சர்வதேச மாநாட்டில் 72 நாடுகள் பங்கேற்றன. அப்போது தமிழ்நாட்டில் 10-ஆம் நூற்றாண்டில் நடைமுறையில் இருந்த குடவோலை முறை குறித்து உலக நாடுகளுக்குத் தெரிவித்தோம். தமிழ்நாட்டில் தொன்மையான ஜனநாயக மதிப்பீடுகள் இருந்ததை எண்ணி, உலக நாடுகள் மிகுந்த மகிழ்ச்சியையும், பெருமையையும் பகிர்ந்து கொண்டன.