உள்கட்டமைப்புக்கு முக்கியத்துவம்: தொழில்துறையினர் வரவேற்பு

மத்திய அரசின் நிதிநிலை அறிக்கைக்கு தொழில் துறையினர் வரவேற்பு தெரிவித்துள்ளனர்.

- 

தீரஜ் ஹிந்துஜா (தலைவர், அசோக் லேலண்ட்): உள்கட்டமைப்பு, உற்பத்தி, பாதுகாப்புத் துறைகளின் மேம்பாட்டுக்காக அதிக நிதி ஒதுக்குவதன் மூலம் நாட்டின் பொருளாதார வளர்ச்சி விரைவுபடுத்தப்பட்டுள்ளது. செயற்கை நுண்ணறிவு (ஏஐ), சுகாதாரம், கல்வி, விவசாயம் உள்ளிட்ட முக்கியத் துறைகளுக்கும் நிதிநிலை அறிக்கை ஆதரவு அளிக்கிறது.

ஏ.ஆர். உன்னிகிருஷ்ணன் (தலைவர், சிஐஐ தமிழ்நாடு கவுன்சில்): நிதிநிலை அறிக்கையில் ஒட்டுமொத்தமாக அறிவிக்கப்பட்டுள்ள பொது மூலதனச் செலவு ஒதுக்கீடான ரூ.12.2 லட்சம் கோடியில் தமிழகம் உள்ளிட்ட மாநிலங்கள் பலன் பெறும்.

தொழில்நுட்ப மேம்பாடு, போட்டித்தன்மை, செயல்திறனை மேம்படுத்த, 200 பாரம்பரிய தொழில்துறை கிளஸ்டர்களை புதுப்பிக்கும் திட்டம் பயன் தரவல்லது. வளிமண்டலத்தில் கரிமம் (கார்பன்) கலப்பது தடுக்கப்பட்டு, பயன்பாடு, சேமிப்பு தொழில் நுட்பங்களுக்காக ரூ.20,000 கோடி ஒதுக்கப்பட்டுள்ளது. இதன்மூலம் தமிழகத்தில் உள்ள சிமென்ட், ரசாயன நிறுவனங்கள் பயன்பெறும். புதிய தேசிய வடிவமைப்பு நிறுவனம், முக்கிய தொழில்துறை சரக்கு போக்குவரத்து முனையங்களில் 5 பல்கலைக்கழக நகரங்களை உருவாக்க மாநிலங்களுக்கு ஆதரவு அளிக்கப்பட்டுள்ளது.