வாரிசுகளின் கடமை

அரசு ஊழியர்கள் பெற்றோரைப் பொறுப்பாக கவனித்துக் கொள்ள வேண்டும்; அவ்வாறு சரிவரக் கவனிக்காமல் புறக்கணித்தால் அந்த அரசு ஊழியரின் ஊதியத்திலிருந்து 10 முதல் 15 சதவீத ஊதியம் பிடித்தம் செய்யப்படும்; அவ்வாறு பிடித்தம் செய்யப்படும் தொகை பெற்றோரின் வங்கிக் கணக்கில் செலுத்தப்படும் வகையில் விரைவில் சட்டம் நிறைவேற்றப்படும் என தெலங்கானா மாநில முதல்வர் ரேவந்த் ரெட்டி தெரிவித்துள்ளார்.

- முனைவர் என். மாதவன்

அண்மையில் புதிதாகத் தேர்ந்தெடுக்கப்பட்ட 783 குரூப்-2 அதிகாரிகளுக்கு பணி நியமன ஆணைகளை வழங்கும் நிகழ்வில் அவர் இந்தத் தகவலைத் தெரிவித்தார். இது நடைமுறைக்கு வர காலம் ஆகலாம். அரசு ஊழியர்களின் பெற்றோருக்கு இவ்வாறான ஏற்பாடு என்றால், இவ்வாறு புறக்கணிக்கப்படும் மற்ற பெற்றோர்களின் நிலை என்ன ஆவது என்ற கேள்வியும் எழுவது இயற்கையே.

பெற்றோர் பராமரிப்பு தொடர்பாக மத்திய பிரதேச மாநிலத்தில் 2024-ஆம் ஆண்டில் தொடுக்கப்பட்ட வழக்கு ஒன்றில், பெற்றோரைப் பராமரிக்க வேண்டியது வாரிசுகளின் சட்டபூர்வமான கடமை என அந்த மாநில உயர்நீதிமன்றம் அறிவுறுத்தியது. இந்த வழக்கும் சிறிது வித்தியாசமானது. நான்கு உடன்பிறப்புகளோடு பிறந்தவரான ஒருவருக்கு அவர்களது பெற்றோர் எவ்வித சொத்தும் தராததால், அவர்களைக் கவனித்துக் கொள்ள வேண்டிய பொறுப்பு தமக்கில்லை என அவர் வழக்குத் தொடுத்திருந்தார்.

அந்த வழக்கில் தீர்ப்பு வழங்கிய நீதிபதி, 'பெற்றோரின் சொத்துகளைப் பெறுகிறீர்களோ இல்லையோ, அவர்களைக் கவனித்துக் கொள்ள நீங்கள் கடமைப்பட்டவர்கள்; சொத்து அளிக்காதது தொடர்பாக வேறு வழக்கை வேண்டுமானால் தொடுத்துக் கொள்ளலாம்' என ஆலோசனை கூறினார்.