காஷ்மீர் பயங்கரவாத தாக்குதல் எதிரொலி தமிழகம் முழுவதும் போலீஸார் உஷார் நிலை

காஷ்மீர் பயங்கரவாத தாக்குதல் சம்பவம் எதிரொலியாக தமிழகம் முழுவதும் போலீஸார் பாதுகாப்புப் பணியில் முழு உஷார் நிலையில் ஈடுபட்டுள்ளனர்.

- 

சென்னை/மதுரை, ஏப்.23:

காஷ்மீர் பெகல்ஹாம் அருகே பைசரன் பள்ளத்தாக்கு பகுதியில் திங்கள்கிழமை பயங்கரவாதிகள் நடத்திய தாக்குதலில் 26 சுற்றுலாப் பயணிகள் உயிரிழந்தனர். பெரும் அதிர்வலையை ஏற்படுத்தியுள்ள இச்சம்பவம் எதிரொலியாக, நாடு முழுவதும் பாதுகாப்பை அதிகரிக்குமாறு மத்திய உளவுத்துறை எச்சரிக்கை விடுத்தது.

இதையடுத்து தமிழக காவல் துறை தலைமை இயக்குநர் சங்கர் ஜிவால், மாநிலம் முழுவதும் பொது இடங்களிலும், பொதுமக்கள் அதிகம் கூடும் இடங்களிலும், வழிபாட்டு தலங்களிலும் பாதுகாப்பை அதிகரிக்கும்படியும், முக்கியமான சாலை சந்திப்புகளில் வாகனச் சோதனை நடத்தும்படியும் அனைத்து மாநகர காவல் ஆணையர்கள், மண்டல ஐ.ஜி.க்கள், சரக டி.ஐ.ஜி.க்கள், மாவட்ட காவல் கண்காணிப்பாளர்கள் ஆகியோருக்கு உத்தரவிட்டார்.