இம்பாக்ட் பிளேயரின் இலக்கணம்

சென்னை எம்.ஏ. சிதம்பரம் கிரிக்கெட் மைதானத்தில் கடந்த ஞாயிற்றுக்கிழமை, மும்பை இண்டியன்ஸ் நிர்ணயித்த வெற்றி இலக்கை நோக்கி சென்னை சூப்பர் கிங்ஸ் விளையாடிக் கொண்டிருந்தது.

- 

சென்னை எம்.ஏ. சிதம்பரம் கிரிக்கெட் மைதானத்தில் கடந்த ஞாயிற்றுக்கிழமை, மும்பை இண்டியன்ஸ் நிர்ணயித்த வெற்றி இலக்கை நோக்கி சென்னை சூப்பர் கிங்ஸ் விளையாடிக் கொண்டிருந்தது. தொடக்கத்திலேயே ஒரு விக்கெட்டை இழந்த சென்னையை, ரச்சின் ரவீந்திரா - கேப்டன் ருதுராஜ் கெய்க்வாட் கூட்டணி ரன்களை விளாசி பலப்படுத்தி வந்தது.

மும்பை பௌலர்களுக்கு நெருக்கடி அதிகரித்த நேரத்தில் வந்தார், ஒரு புதிய இடதுகை லெக் ஸ்பின்னர். அரைசதம் கடந்து முன்னேறி வந்த ருதுராஜை 8-ஆவது ஓவரில் வெளியேற்றிய அவர், அதிரடி சிக்ஸர்கள் விளாசும் ஷிவம் துபேவை 10-ஆவது ஓவரில் பெவிலியனுக்கு அனுப்பினார்.

அதுவும் போதாதென்று, தீபக் ஹூடாவையும் 12-ஆவது ஓவரில் ஆட்டமிழக்கச் செய்தார். இதனால் சற்றே தடுமாறிப்போன சென்னை, பின்னர் தன்னை மீட்டுக் கொண்டு வெற்றி பெற்றாலும், சென்னை ரசிகர்கள் உள்பட அனைவரின் கவனத்தையும் ஈர்த்திருந்தார், அந்த அறிமுக பௌலர் விக்னேஷ் புதூர்.

ஆட்டத்தின் முடிவில் சென்னை நட்சத்திர வீரர் எம்.எஸ். தோனி, அவரின் தோளில் தட்டுக் கொடுத்து பாராட்டினார். இதை, கேரளத்தின் பெரிந்தல்மண்ணா என்ற சிறிய ஊரிலிருந்து தொலைக்காட்சியில் பார்த்து பூரித்துக் கொண்டிருந்தனர் விக்னேஷ் புதூரின் ஆட்டோ ஓட்டும் தந்தை சுனில்குமார் - இல்லதரசி தாயார் பிந்து.