அழுத்தத்துக்கு அஞ்ச மாட்டேன்: விஜய்

எத்தகைய அழுத்தம் கொடுத்தாலும் தான் அஞ்சப்போவதில்லை என்று தமிழக வெற்றிக் கழகத்தின் (தவெக) தலைவர் விஜய் உறுதிபடத் தெரிவித்தார்.

- 

தவெக மாநில, மாவட்ட அளவிலான செயல்வீரர்கள் ஆலோசனைக் கூட்டம் சென்னையை அடுத்த மாமல்லபுரத்தில் உள்ள தனியார் மண்டபத்தில் ஞாயிற்றுக்கிழமை நடைபெற்றது. இதில் விஜய் பேசியதாவது:

தவெகவின் அரசியல் பயணத்தில் மிக முக்கியக் காலகட்டத்தில் இருக்கிறோம். தமிழகத்தில் ஏற்கெனவே ஆட்சியில் இருந்தவர்கள் பாஜகவின் அடிமையாக இருந்தனர். இப்போது ஆட்சியில் இருப்பவர்களாலும் மக்களுக்கு எந்த பயனும் இல்லை. பாஜகவிடம் அதிமுக நேரடியாக சரணடைந்துவிட்டது; திமுக மறைமுகமாக சரணடைந்துள்ளது.

தனது வேடம் கலைந்துவிடக் கூடாது என்பதற்காக, ஆளும் கட்சி பல்வேறு கவர்ச்சிகரமான அறிவிப்புகளை தற்போது வெளியிட்டு வருகிறது. இந்தச் சூழலில், நமக்காக உண்மையாக உழைப்பதற்கு யாராவது வந்துவிட மாட்டார்களா என மக்கள் அழுத்தத்தில் இருக்கின்றனர். இரு கட்சிகளுக்கும் மாறி, மாறி வாக்களித்து ஏமாந்துவிட்டதால், அவர்கள் தவெகவை நம்புகிறார்கள்.

தவெகவுடன் யார் கூட்டணி வைக்கப் போகிறார்கள் எனப் பலரும் பல்வேறு வித ஆரூடங்களைக் கூறுகின்றனர்.