வசதி அல்ல; உரிமை!

பள்ளிகளில் பாதுகாப்பான கழிப்பறை என்பது வசதி அல்ல; அது மாணவர்களுக்கான உரிமையாகும்.

- 

நவம்பர் 19-ஆம் தேதி உலக கழிப்பறை விழிப்புணர்வு தினமாகக் கடைப்பிடிக்கப்பட்டு கழிப்பறைகள் பராமரிப்பு, அதன் முக்கியத்துவம் குறித்து வலியுறுத்தப்படுகிறது. பெரும்பாலான அரசு, தனியார் பள்ளிகளில் போதிய கழிப்பறை வசதிகள் மாணவ, மாணவிகளுக்குச் செய்து தரப்படவில்லை என்பதுதான் எதார்த்த நிலை. பள்ளிகளில் கழிப்பறைத் தூய்மை இன்னும் மேம்படுத்தப்பட வேண்டும்.

மூன்று மணி நேரத்துக்கு ஒரு முறை சிறுநீர் கழிக்க வேண்டும் என்று கூறும் மருத்துவர்கள், குறிப்பாகச் சிறுவர்கள் இதைக் கண்டிப்பாகக் கடைப்பிடிக்க வேண்டும் எனவும் அறிவுறுத்துகின்றனர். குறிப்பிட்ட கால இடைவெளியில் மட்டுமே அனைத்து மாணவர்களும் பயன்படுத்தும் வகையில் நேரம் வழங்கப்படுவதால், பல மாணவர்கள் சுகாதாரம் கருதி கழிப்பறையைப் பயன்படுத்தாத நிலைக்குத் தள்ளப்படுகின்றனர். இதனால், அவர்கள் உடல் ரீதியாகப் பல்வேறு சிக்கல்களைச் சந்திக்கின்றனர்.

‘பள்ளிகளில் சுகாதாரமற்ற நிலையிலுள்ள கழிப்பறைகளைப் பயன்படுத்தத் தயங்கும் மாணவர்கள், அதைப் பயன்படுத்த விரும்பாமல் பள்ளி நேரங்களில் தண்ணீர் குடிப்பதையே தவிர்த்து விடுகின்றனர்’ என்று ஒரு ஆய்வு தெரிவிக்கிறது. இதனால், அவர்களுக்குக் கழிப்பறையைப் பயன்படுத்தும் ஒழுங்குமுறை மாறி, உடல்நலக் கோளாறுகளும் ஏற்படுகின்றன. இதில் மாணவிகளே அதிக அளவில் பாதிக்கப்படுகின்றனர்.