அரசு மரியாதையுடன் வி.எஸ்.அச்சுதானந்தன் உடல் தகனம்

மறைந்த கேரள முன்னாள் முதல்வர், மார்க்சிஸ்ட் கம்யூனிஸ்ட் கட்சியின் மூத்த தலைவருமான வி.எஸ். அச்சுதானந்தனின் உடல், ஆலப்புழையில் உள்ள அரசு மயானத்தில் புதன்கிழமை இரவு முழு அரசு மரியாதையுடன் தகனம் செய்யப்பட்டது.

- 

திருவனந்தபுரம், ஜூலை 23:

முன்னதாக, திருவனந்தபுரம் முதல் ஆலப்புழை வரையில் 22 மணி நேரம் நீடித்த அவரது இறுதி ஊர்வலத்தில் ஆயிரக்கணக்கான மக்கள் திரண்டு கண்ணீர் அஞ்சலி செலுத்தினர்.

மாரடைப்பு காரணமாக கடந்த ஜூன் 23-ஆம் தேதி முதல் திருவனந்தபுரத்தில் உள்ள தனியார் மருத்துவமனையில் சிகிச்சை பெற்றுவந்த அச்சுதானந்தன், கடந்த திங்கள்கிழமை பிற்பகலில் காலமானார்.

அவரது மறைவைத் தொடர்ந்து, மருத்துவமனையிலிருந்து எடுத்து வரப்பட்ட அவரது உடல் முதலில் மார்க்சிஸ்ட் கம்யூனிஸ்ட் கட்சியின் ஏகேஜி ஆய்வு மைய அரங்கிலும், பின்னர் தலைநகரில் அவர் வசித்து வந்த வீட்டிலும் பொது மக்களின் அஞ்சலிக்காக வைக்கப்பட்டது.