சமூக நலத் திட்டங்களால் 95 கோடி பேர் பலன்

மனதின் குரல் நிகழ்ச்சியில் பிரதமர் மோடி

- 

புது தில்லி, ஜூன் 29: நாட்டில் சமூக நலத் திட்டங்களால் 95 கோடி பேர் பலனடைகின்றனர்; கடந்த 2015-ஆம் ஆண்டுக்கு முன்புவரை 25 கோடிக்கும் குறைவானவர்களையே நலத் திட்டப் பலன்கள் சென்றடைந்திருந்தன என்று பிரதமர் நரேந்திர மோடி தெரிவித்தார்.

சர்வதேச தொழிலாளர் அமைப்பின் (ஐஎல்ஓ) அறிக்கையை சுட்டிக்காட்டிய பிரதமர், இந்திய மக்கள்தொகையில் 64 சதவீதத்துக்கும் மேற்பட்டோருக்கு ஏதாவது ஒரு நலத் திட்டத்தின் கீழ் சமூகப் பாதுகாப்பு உறுதி செய்யப்பட்டுள்ளது என்றார்.

ஒவ்வொரு மாதமும் கடைசி ஞாயிற்றுக்கிழமையில் 'மனதின் குரல்' வானொலி நிகழ்ச்சி வாயிலாக பிரதமர் மோடி நாட்டு மக்களுக்கு உரையாற்றி வருகிறார். 123-ஆவது மனதின் குரல் நிகழ்ச்சி ஞாயிற்றுக்கிழமை (ஜூன் 29) ஒலிபரப்பானது. அதில், பிரதமர் பேசியதாவது:

கடந்த ஜூன் 21-ஆம் தேதி கொண்டாடப்பட்ட சர்வதேச யோகா தினத்தில் இந்தியா மட்டுமன்றி உலகெங்கிலும் இருந்து கோடிக்கணக்கான மக்கள் இணைந்தனர். பத்தாண்டுகளாகத் தொடரும் இந்த நிகழ்வு, ஒவ்வோர் ஆண்டும் மேன்மேலும் வளர்கிறது. இது, அதிகமான மக்கள் தங்கள் அன்றாட வாழ்வில் யோகாவை அங்கமாக்கி வருகின்றனர் என்பதன் அறிகுறியாகும்.