தாக்குதல் தொடரும்: இஸ்ரேல்-ஈரான் பரஸ்பரம் எச்சரிக்கை

இஸ்ரேல்-ஈரான் இடையிலான தாக்குதல் 4-ஆவது நாளாக திங்கள்கிழமை நீடித்தது. தாக்குதலை தொடரவிருப்பதால் ஈரான் தலைநகர் டெஹ்ரானில் இருந்தும், இஸ்ரேலின் டெல் அவிவ் நகரில் இருந்தும் மக்கள் வெளியேற வேண்டும் என்று இரு நாடுகளும் பரஸ்பரம் எச்சரிக்கை விடுத்தன.

- 

டெல் அவிவ்/டெஹ்ரான், ஜூன் 16:

ஈரானின் அணுசக்தி, ஏவுகணைத் திட்டங்களால் தமக்கு அச்சுறுத்தல் இருப்பதாக கருதிய இஸ்ரேல், ஈரான் மீது 'ஆபரேஷன் ரைசிங் லயன்' என்ற பெயரில் கடந்த வெள்ளிக்கிழமை வான்வழித் தாக்குதல் மேற்கொண்டது. இதற்குப் பதிலடி அளிக்கும் நோக்கில், 'ஆபரேஷன் ட்ரூ பிராமிஸ் 3' என்ற பெயரில் இஸ்ரேல் மீது ஈரான் ஏவுகணை மற்றும் ட்ரோன் தாக்குதல் நடத்தி வருகிறது.

ஏற்கெனவே ஈரானின் தாக்குதலில் இஸ்ரேலின் டெல் அவிவ், ரமத் கான், ரிஷோன் லெசியான், ரெஹோவோட், டம்ரா உள்ளிட்ட நகரங்கள் சேதமடைந்த நிலையில், இஸ்ரேல் மீது ஏராளமான ஏவுகணைகளை ஏவி ஈரான் திங்கள்கிழமை கடுமையான தாக்குதலை மேற்கொண்டது.