பதுங்குமிடங்களைத் தயார்படுத்தும் எல்லையோர மக்கள்

ஜம்மு-காஷ்மீரின் 5 மாவட்ட எல்லைப் பகுதிகளில் பாகிஸ்தான் ராணுவத்தினர் தொடர்ந்து 8-ஆவது நாளாக வியாழக்கிழமை இரவிலும் அத்துமீறி துப்பாக்கிச்சூட்டில் ஈடுபட்டனர்.

- 

ஜம்மு/ஸ்ரீநகர், மே 2: இதற்கு இந்தியா தரப்பில் தக்க பதிலடி தரப்பட்டது.

பாகிஸ்தானின் துப்பாக்கிச்சூடு நீடிக்கும் நிலையில், எல்லையோர கிராம மக்கள் தங்களைத் தற்காத்துக் கொள்வதற்காக பதுங்குமிடங்களைத் தயார்படுத்தத் தொடங்கியுள்ளனர்.

கடந்த ஏப்ரல் 22-ஆம் தேதி நடந்த பஹல்காம் பயங்கரவாதத் தாக்குதல் எதிரொலியாக, சிந்து நதி நீர் ஒப்பந்தம் நிறுத்திவைப்பு உள்பட பாகிஸ்தான் மீது இந்தியா ராஜீய ரீதியில் பல்வேறு கடுமையான நடவடிக்கைகளை மேற்கொண்டது.

இந்த அறிவிப்புகள் வெளியான சில மணிநேரங்களுக்குப் பின்னர் (கடந்த 24-ஆம் தேதி இரவு), எல்லையில் போர் நிறுத்த ஒப்பந்தத்தை மீறி பாகிஸ்தான் ராணுவம் அத்துமீறி துப்பாக்கிச் சூடு நடத்தியது. அதன் பிறகான நாள்களிலும் இரவு நேரத்தில் பாகிஸ்தான் ராணுவத்தினரின் அத்துமீறல் நீடித்து வருகிறது.