பாரம்பரியம், நவீனத்துவத்தை ஒருங்கிணைப்பதே தேசிய கல்விக் கொள்கையின் நோக்கம்

குடியரசுத் தலைவர் திரௌபதி முர்மு

- 

திருவாரூர், செப். 3: பாரம்பரியம் மற்றும் நவீனத்துவத்தின் சிறந்த அம்சங்களை ஒருங்கிணைப்பதே தேசிய கல்விக் கொள்கையின் நோக்கம் என குடியரசுத் தலைவரும், தமிழ்நாடு மத்திய பல்கலைக்கழக மேன்மையருமான திரௌபதி முர்மு தெரிவித்தார்.

திருவாரூர் மாவட்டம், நீலக்குடியில் உள்ள தமிழ்நாடு மத்திய பல்கலைக்கழகத்தில் புதன்கிழமை நடைபெற்ற 10-ஆவது பட்டமளிப்பு விழாவில் பட்டங்களை வழங்கி அவர் பேசியது:

தமிழ்நாடு பண்டைய நாகரிகத்துக்காக உலகம் முழுவதும் புகழ்பெற்றது. திருவாரூர் அதன் வளமான கலாசார பாரம்பரியத்துக்குப் பெயர் பெற்றது.

கல்வி என்பது தனிநபர் வளர்ச்சியை சமூக வளர்ச்சியுடன் இணைப்பதை நோக்கமாகக் கொண்டிருக்க வேண்டும். புகழ்பெற்ற தத்துவஞானியும் எனது முன்னோடிகளில் ஒருவருமான எஸ். ராதாகிருஷ்ணன், எழுத்தறிவு என்பது கல்வி அல்ல, மாறாக ஞானத்தின் வளர்ச்சி, மற்றவர்களை இரக்கத்துடன் பார்க்கும் திறன், அதுதான் அவசியம் என்று கூறியுள்ளார்.