பாஜகவுக்கு ஆதரவாக தேர்தல் ஆணையம்

இந்திய தேர்தல் ஆணையம் தனது கடமையைச் செய்யாமல், பாஜகவின் நலன்களுக்காகப் பாடுபடுகிறது என்று மக்களவை எதிர்க்கட்சித் தலைவர் ராகுல் காந்தி கடுமையாகக் குற்றஞ்சாட்டினார்.

- 

புவனேசுவரம், ஜூலை 11:

மகாராஷ்டிரத்தைப் போல் எதிர்வரும் பிகார் சட்டப்பேரவைத் தேர்தலிலும் முறைகேட்டில் ஈடுபட பாஜக சதி செய்கிறது என்றும் அவர் கூறினார்.

பிகாரில் வாக்காளர் பட்டியல் சிறப்பு தீவிர திருத்தப் பணிக்கு எதிரான மனுக்களை வியாழக்கிழமை விசாரித்த உச்சநீதிமன்றம், அந்தப் பணியைத் தொடர தேர்தல் ஆணையத்துக்கு அனுமதி அளித்த நிலையில், ராகுல் இக்குற்றச்சாட்டை முன்வைத்துள்ளார்.

பாஜகவின் வெற்றிக்கு உதவவே இப்பணி மேற்கொள்ளப்பட்டுள்ளது என்பது காங்கிரஸ் உள்ளிட்ட எதிர்க்கட்சிகளின் கருத்தாகும்.

ஒடிஸா மாநிலம், புவனேசுவரத்தில் காங்கிரஸ் சார்பில் வெள்ளிக்கிழமை நடைபெற்ற 'அரசமைப்புச் சட்டத்தைப் பாதுகாப்போம்' என்ற பேரணியில் ராகுல் பங்கேற்றுப் பேசியதாவது: மகாராஷ்டிரத்தில் வாக்காளர் பட்டியலில் நடந்த முறைகேடுகளே, அந்த மாநில பேரவைத் தேர்தலில் பாஜகவுக்கு வெற்றியை ஈட்டித் தந்தது. இத்தேர்தலுக்கு முன் வாக்காளர் பட்டியலில் ஒரு கோடி பேர் சேர்க்கப்பட்டது எப்படி என்ற கேள்விக்கு தேர்தல் ஆணையம் இதுவரை பதிலளிக்கவில்லை.

மகாராஷ்டிர பாணியில், எதிர்வரும் பிகார் பேரவைத் தேர்தலிலும் முறைகேட்டில் ஈடுபட பாஜக சதியில் ஈடுபட்டுள்ளது.

அத்தகைய 'தேர்தல் திருட்டு' முயற்சிகளை முறியடிக்க எங்களின் 'இண்டி' கூட்டணி தீர்மானித்துள்ளது.