வர்த்தகப் பேச்சு: அமெரிக்கா-சீனா உடன்பாடு

அமெரிக்கா-சீனா இடையிலான வர்த்தகப் பேச்சுவார்த்தையில் உடன்பாடு ஏற்பட்டுள்ளதாக அமெரிக்க அதிபர் டொனால்ட் டிரம்ப் புதன்கிழமை அறிவித்தார்.

- 

வாஷிங்டன், ஜூன் 11:

புதிய வர்த்தக ஏற்பாட்டின் கீழ், பூமியில் இருந்து அகழ்ந்தெடுக்கப்படும் அரிய கனிமங்களும், காந்தங்களும் சீனாவில் இருந்து அமெரிக்காவில் இறக்குமதி செய்யப்படும் என்றும், அமெரிக்காவில் இறக்குமதி செய்யப்படும் சீன பொருள்களுக்கு 55 சதவீத வரி விதிக்கப்படும் என்றும் டிரம்ப் தெரிவித்தார்.

இந்தியா, சீனா போன்ற எண்ணற்ற நாடுகள் அமெரிக்கா மீது பெருமளவு வரி விதிப்பதாகக் குற்றஞ்சாட்டிய அமெரிக்க அதிபர் டிரம்ப், இனி ஒவ்வொரு நாடும் அமெரிக்க பொருள்களுக்கு என்ன வரி விதிக்கிறதோ, அதே வரியை அந்நாடுகளின் பொருள்கள் மீது அமெரிக்காவும் விதிக்கும் என்று சில மாதங்களுக்கு முன்பு அறிவித்தார்.

அதன்படி, பிற நாடுகளில் இருந்து அமெரிக்காவில் இறக்குமதி செய்யப்படும் பொருள்களுக்கு கூடுதலாக அதிக அளவில் டிரம்ப் வரி விதித்தார். இதனால் சீனா பெரிதும் பாதிக்கப்பட்டது. இதைத் தொடர்ந்து, அமெரிக்க பொருள்கள் மீது சீனாவும் பதிலுக்குப் பதில் வரியை உயர்த்தியது. இவ்வாறு சீன பொருள்கள் மீது அமெரிக்கா விதித்த வரி 145 சதவீதத்தையும், அமெரிக்க பொருள்கள் மீது சீனா விதித்த வரி 125 சதவீதத்தையும் எட்டியது.