அதிமுக ஆட்சியில் இயற்கை விவசாயத்துக்கு முன்னுரிமை

எடப்பாடி கே.பழனிசாமி

- 

திருநெல்வேலி, ஆக. 4: அதிமுக ஆட்சிக்கு வரும்போது இயற்கை விவசாயத்துக்கு முன்னுரிமை அளிக்கப்படும் என்று அதிமுக பொதுச் செயலர் எடப்பாடி கே.பழனிசாமி தெரிவித்தார்.

திருநெல்வேலி மாவட்டத்தில் 'மக்களை காப்போம், தமிழகத்தை மீட்போம்' என்ற சுற்றுப்பயணம் மேற்கொண்டுள்ள எடப்பாடி கே.பழனிசாமி, திருநெல்வேலி சந்திப்பில் திருநெல்வேலி மாவட்ட விவசாயிகள்-வியாபாரிகளுடன் திங்கள்கிழமை கலந்துரையாடினார்.

தொடர்ந்து அவர்களது கோரிக்கைகளுக்கு பதிலளித்து அவர் பேசியதாவது: இயற்கை விவசாயத்தைப் பற்றி இங்கு கருத்து தெரிவிக்கப்பட்டது. நமது மாவட்டச் செயலர் கணேசராஜா இயற்கை விவசாயத்தைப் பற்றி முழுமையாக அறிந்தவர். இயற்கையாக விளைவிக்கப்படுகிற உணவுப் பொருள்கள் உடல் நலத்திற்கு நல்லது. நோய்த் தொற்று வராது. இயற்கை முறை தானியங்களுக்கு கூடுதல் விலை கிடைக்கிறது. இவ்விவசாயத்துக்கு நாடு முழுவதும் நல்ல வரவேற்பு உள்ளது. அதனால் மக்களுக்கும் இயற்கை விவசாயத்தின் மீது நம்பிக்கை ஏற்பட்டுள்ளது. அதிமுக ஆட்சிக்கு வரும்போது இயற்கை விவசாயத்துக்கான அனைத்து உதவிகளும் செய்யப்படும்.

அதிமுக ஆட்சிக் காலத்தில் குடிமராமத்துப் பணிகள் மூலமாக சுமார் ரூ.1,240 கோடியில் 24 ஆயிரம் ஏரி, குளங்கள் மற்றும் 6,000 நீர்நிலைகள் தூர்வாரப்பட்டன.