சிபிஎஸ்இ 10, 12-ஆம் வகுப்பு தேர்வு: சென்னை மண்டலம் 3-ஆவது இடம்

மத்திய இடைநிலைக் கல்வி வாரிய (சிபிஎஸ்இ) 10, 12-ஆம் வகுப்பு பொதுத் தேர்வு முடிவுகள் செவ்வாய்க்கிழமை வெளியிடப்பட்டன.

- 

புது தில்லி, மே 13: இதில், 10-ஆம் வகுப்பில் 93% பேரும், 12-ஆம் வகுப்பில் 88.39% மாணவ, மாணவிகளும் தேர்ச்சி பெற்றனர்.

சிபிஎஸ்இ 12-ஆம் வகுப்பில் சென்னை மண்டலம் 3-ஆவது இடம் பெற்றது.

நிகழாண்டு சிபிஎஸ்இ 12-ஆம் வகுப்புத் தேர்வை நாடு முழுவதும் 16,92,794 பேர் எழுதினர். இவர்களில் 88.39% பேர் தேர்ச்சி பெற்றனர். இது கடந்த ஆண்டு தேர்ச்சி விகிதமான 87.98 சதவீதத்தைக் காட்டிலும் சற்று கூடுதலாகும்.

தேர்வில் மாணவிகள் 91.64 சதவீதமும், மாணவர்கள் 85.70 சதவீதமும் தேர்ச்சி பெற்றனர்.

மூன்றாம் பாலினத்தவர் கடந்த ஆண்டில் 50% பேர் தேர்ச்சி பெற்ற நிலையில், இம்முறை தேர்வில் பங்கேற்ற அனைவரும் தேர்ச்சி பெற்றனர்.

1 லட்சத்துக்கும் மேல் 90% மதிப்பெண்: தேர்ச்சி பெற்றவர்களில் 24,867 மாணவ, மாணவிகள் 95 சதவீதத்துக்கும் மேல் மதிப்பெண் பெற்றனர். 1,11,544 பேர் 90 சதவீதத்துக்கும் மேல் மதிப்பெண் பெற்று அசத்தியுள்ளனர். இவர்களில் சிறப்புக்குழந்தைகள் (சிஎஸ்டபிள்யுஎன்) 55 பேர் 95% மதிப்பெண்ணும், 290 பேர் 90 சதவீதத்துக்கும் மேல் மதிப்பெண்ணும் பெற்றனர்.