2034-இல் ஒரே நாடு ஒரே தேர்தல்? ஜேபிசி பதவிக் காலத்தை நீட்டிக்க திட்டம்

2034-ஆம் ஆண்டில் 'ஒரே நாடு, ஒரே தேர்தல்' திட்டத்தை நடைமுறைப்படுத்த இந்தியா ஆயத்தமாகி வருகிறது.

- நமது சிறப்பு நிருபர்

புது தில்லி, ஜூன் 15: இது சாத்தியமானால், 2029 -ஆம் ஆண்டுக்குப் பிறகு ஆட்சிக்கு வரும் சட்டப்பேரவைகள் குறுகிய பதவிக் காலத்தைக் கொண்டிருக்கும்.

அதாவது, 2029 -ஆம் ஆண்டுக்குப் பிறகு தேர்ந்தெடுக்கப்படும் அனைத்து மாநில சட்டப்பேரவைகள், மக்களவை பொதுத் தேர்தலுடன் சேர்ந்து தேர்தலைச் சந்திக்கும் வகையில் குறைந்த பதவிக் காலத்தைக் கொண்டிருக்கும். இது தொடர்பான செயல்முறை பரிந்துரைகளை, இதற்கென உருவாக்கப்பட்டுள்ள நாடாளுமன்ற கூட்டுக் குழு (ஜேபிசி) வழங்கும் என்று தெரிகிறது.

இந்தக் கூட்டுக் குழு 'ஒரே நாடு, ஒரே தேர்தல்' தொடர்பாக பல்வேறு தரப்பு பிரதிநிதிகளையும் சந்தித்து கருத்துகளைப் பதிவு செய்து விசாரணை நடத்தி வருகிறது. ஜூலை மாதம் நிறைவடையவுள்ள அதன் பதவிக் காலத்தை எதிர்வரும் நாடாளுமன்ற மழைக்கால கூட்டத்தொடரின்போது நீட்டிக்க முடிவு செய்யப்பட்டுள்ளது.