ஓடிடி, சமூக வலைதளங்களில் ஆபாச காட்சிகள்: மத்திய அரசு பதிலளிக்க உச்சநீதிமன்றம் உத்தரவு

ஓடிடி மற்றும் சமூக வலைதளங்களில் பாலியல் சார்ந்த ஆபாச காட்சிகள், பதிவுகளுக்கு தடை விதிப்பது தொடர்பாக தாக்கல் செய்யப்பட்ட மனு மீது பதிலளிக்க மத்திய அரசு, ஓடிடி தளங்கள் மற்றும் சமூக வலைதளங்களுக்கு உச்சநீதிமன்றம் திங்கள்கிழமை உத்தரவிட்டது.

- 

புது தில்லி, ஏப். 29:

மேலும், இந்த விவகாரத்தில் நாடாளுமன்றம் அல்லது நிர்வாகம்தான் நடவடிக்கை மேற்கொள்ள முடியும் எனவும் உச்சநீதிமன்றம் தெரிவித்தது.

இணையத்தில் ஆபாச புகைப்படங்கள், காட்சிகளைப் பதிவிடுவதைத் தடுக்க தனியொரு ஆணையத்தை உருவாக்கி விதிகளை வகுக்கக் கோரி 5 மனுதாரர்கள் உச்சநீதிமன்றத்தில் மனு தாக்கல் செய்தனர்.

சமுதாயத்துக்குப் பாதிப்பு? அந்த மனுவில், 'சமூக வலைதளங்களில் எவ்வித வரம்புமின்றி ஆபாச பதிவுகளை வெளியிட தனியே பக்கங்கள் மற்றும் பயனாளர்கள் உள்ளனர். அதேபோல் குழந்தைகளை ஆபாசமாகச் சித்தரிக்கும் வகையிலான புகைப்படங்கள் மற்றும் காட்சிகளை ஓடிடி வலைதளங்களும் வெளியிட்டு வருகின்றன.

இதுபோன்ற பதிவுகளால் குழந்தைகள், இளைஞர்கள் உள்பட அனைத்துத் தரப்பினரின் மனநிலையையும் வெகுவாக பாதிக்கப்படும் அபாயம் ஏற்பட்டுள்ளது. இதனால் குற்றங்களும் மேலும் அதிகரிக்க வாய்ப்புள்ளது.

இணையத்தில் பகிரப்படும் ஆபாச பதிவுகளைத் தடுக்கத் தவறினால் சமுதாய மதிப்புகள், இளைஞர் மனநலன் மற்றும் பொதுப் பாதுகாப்பு கேள்விக்குறியாகும் சூழல் ஏற்படும்.