பாஜக ஆட்சியில் மதச்சார்பின்மை, கூட்டாட்சி முறை சீர்குலைவு

மாணிக் சர்க்கார்

- 

மதுரை ஏப். 2: மத்திய பாஜக ஆட்சியில் மதச்சார்பின்மை, கூட்டாட்சி முறை சீர்குலைந்துவிட்டதாக திரிபுரா மாநில முன்னாள் முதல்வர் மாணிக் சர்க்கார் குற்றஞ்சாட்டினார்.

மதுரையில் மார்க்சிஸ்ட் கம்யூனிஸ்ட் கட்சியின் அகில இந்திய மாநாட்டின் தொடக்கமாக நடைபெற்ற பொது மாநாட்டுக்கு தலைமை வகித்து மாணிக் சர்க்கார் பேசியதாவது:

மத்தியில் நரேந்திர மோடி தலைமையிலான அரசு பதவியேற்று பதினொரு ஆண்டுகள் கடந்துவிட்டன. இந்துத்துவ கொள்கையை அமல்படுத்தும் அரசாகவே இது இருந்து வருகிறது. மேலும், பெருநிறுவனங்களுக்கும், ஆர்எஸ்எஸ்-பாஜகவுக்கும் இடையிலான உறவு இவ்வளவு வலுவாகவும், வெளிப்படையாகவும் இருந்ததில்லை. இதன் விளைவாக ஜனநாயகம், மதச்சார்பின்மை, கூட்டாட்சி முறை ஆகியவை சீர்குலைந்துள்ளன.

தற்போது நடைபெறும் இந்த மாநாடு, பாஜக-ஆர்எஸ்எஸ் அமைப்புகளை எதிர்த்துப் போராடவும், மதவாத அமைப்புகளைத் தனிமைப்படுத்தவும், அவற்றைத் தோற்கடிக்கவும் எடுக்க வேண்டிய நடவடிக்கைகள் குறித்து விவாதிக்கும். இத்துடன் நாட்டில் உள்ள அனைத்து மதச்சார்பற்ற ஜனநாயக சக்திகளையும் ஒன்றிணைப்பது, தொழிலாளர்கள், விவசாயிகள், பட்டியலினத்தவர்கள், ஆதிவாசிகள், பெண்கள், சிறுபான்மையினரின் உரிமைகளைப் பாதுகாப்பது குறித்தும் மாநாட்டில் விவாதிக்கப்படும்.