ஸ்பெயின், எகிப்துக்கு முதல் வெற்றி

ஃபிஃபா உலகக் கோப்பை கால்பந்து போட்டியில் முன்னாள் சாம்பியன் ஸ்பெயின், எகிப்து ஆகிய அணிகள் தங்கள் முதல் வெற்றியை திங்கள்கிழமை பதிவு செய்தன.

- 

இரு அணிகளுமே தங்கள் குரூப்பில் முதலிடத்தில் இருக்கும் நிலையில், அந்த குரூப்பின் கடைசி ஆட்டத்தில் தான் அவற்றின் நாக்அவுட் சுற்று வாய்ப்பு குறித்து தெரியவரும். இரு முறை சாம்பியனான உருகுவே, தரவரிசையில் டாப் 10 அணியான பெல்ஜியம் ஆகியவை இன்னும் ஒரு வெற்றி கூட பெறாமல் தடுமாற்றத்தைச் சந்தித்து வருகின்றன.

ஒயர்ஸ்பல், யமால் பங்களிப்பில் வென்றது ஸ்பெயின்

அமெரிக்காவின் அட்லாண்டா நகரில் நடைபெற்ற ஆட்டத்தில் ஸ்பெயின் 4-0 கோல் கணக்கில் சவூதி அரேபியாவை எளிதாக வென்றது. அந்த அணிக்காக மைக்கேல் ஒயர்ஸ்பல் 2 கோல்கள் அடித்து அசத்தினார்.

ஸ்பெயின் அணியின் கோல் கணக்கை, முதல்முறையாக உலகக் கோப்பை போட்டியில் களமிறங்கியிருக்கும் இளம் வீரர் லேமின் யமால் 10-ஆவது நிமிஷத்தில் தொடங்கிவைத்தார்.

கேப் வெர்டுடன் ஸ்பெயின் டிரா செய்த முதல் ஆட்டத்தில் 2-ஆவது பாதியில் களமிறக்கப்பட்ட யமால், இந்த ஆட்டத்தில் தொடக்க லெவனிலேயே இடம் பிடித்து, 10-ஆவது நிமிஷத்தில் கோல் அடித்தார்.