மேக்கேதாட்டு அணை கூடாது

மேக்கேதாட்டு அணை கட்ட கர்நாடக அரசுக்கு எதிர்ப்பு தெரிவித்தும், அணையை கட்டுவதற்கான அனுமதியை மத்திய அரசு அளிக்கக் கூடாது என வலியுறுத்தியும் தமிழக சட்டப் பேரவையில் முதல்வர் சி.ஜோசப் விஜய் வெள்ளிக்கிழமை கொண்டுவந்த தனித் தீர்மானம் அனைத்துக் கட்சிகள் ஆதரவுடன் ஒருமனதாக நிறைவேறியது.

- 

தமிழக சட்டப்பேரவைக் கூட்டத்தொடரின் இரண்டாம் நாளான வெள்ளிக்கிழமை பேரவைத் தலைவர் ஜே.சி.டி. பிரபாகர் தலைமையில் நடைபெற்ற கூட்டத்தில் மேக்கேதாட்டு அணை விவகாரத்தில் கர்நாடக அரசின் நடவடிக்கையை எதிர்த்து, தனித் தீர்மானத்தை முன்மொழிந்து, முதல்வர் ஜோசப் விஜய் பேசியதாவது:

காவிரி நடுவர் மன்றம் 5.2.2007-இல் அளித்த இறுதித் தீர்ப்பையும், உச்சநீதிமன்றம் 16.2.2018-இல் அளித்த தீர்ப்பையும் மதிக்காமலும், சம்பந்தப்பட்ட படுகை மாநிலங்களின் இசைவைப் பெறாமலும், மத்திய அரசின் எந்தவித அனுமதியைப் பெறாமலும், கர்நாடக அரசு தன்னிச்சையாக காவிரி நதியின் குறுக்கே மேக்கேதாட்டில் அணை கட்ட முயற்சி மேற்கொள்வதை எந்த வகையிலும் ஏற்றுக்கொள்ள முடியாது. அதனால், கர்நாடக அரசின் இச்செயலுக்கு கடும் எதிர்ப்பை இப்பேரவை தெரிவித்துக்கொள்கிறது.

மத்திய அரசு அனுமதிக்கக் கூடாது: கர்நாடக அரசின் மேக்கேதாட்டு அணைத் திட்டத்துக்கு தொழில்நுட்பம், சுற்றுச் சூழல் உள்பட எவ்வித அனுமதியும் அளிக்கக்கூடாது என மத்திய அரசை இப்பேரவை வலியுறுத்துகிறது.

காவிரி நடுவர் மன்றமும், உச்சநீதிமன்றமும், காவிரிப்படுகை ஒரு பற்றாக்குறைப்படுகை எனக் குறிப்பிட்டுள்ளது. படுகையின் மொத்த நீரையும், படுகை மாநிலங்களுக்கு பகிர்ந்தளித்துவிட்டால், காவிரிப் படுகையில் புதிய திட்டங்களை மேற்கொள்ளவோ, கூடுதலாக நீரை பயன்படுத்தவோ இயலாது.