கேரள சுகாதார அமைச்சர் பதவி விலகக் கோரி வலுக்கும் போராட்டம்

கேரள சுகாதாரத் துறை அமைச்சர் வீணா ஜார்ஜ் பதவி விலகக் கோரி காங்கிரஸ் தொடர்ந்து 3-ஆவது நாளாக போராட்டத்தில் ஈடுபட்டு வருகிறது.

- 

திருவனந்தபுரம், ஜூலை 5:

கோட்டயத்தில் உள்ள அரசு மருத்துவக் கல்லூரி மருத்துவமனை கட்டடத்தின் ஒரு பகுதி வியாழக்கிழமை இடிந்து விழுந்ததில் பெண் ஒருவர் உயிரிழந்த சம்பவத்துக்கு பொறுப்பேற்று அம்மாநில சுகாதாரத் துறை அமைச்சர் வீணா ஜார்ஜ் பதவி விலகக் கோரி எதிர்க்கட்சிகளான பாஜக, காங்கிரஸ் வியாழக்கிழமை போராட்டத்தைத் தொடங்கின.

இந்நிலையில், வாய்களில் கருப்புத் துணியை கட்டிக்கொண்டு ‘வீணா ஜார்ஜ் பதவி விலக வேண்டும்’ என்ற வாசகங்களுடன் கூடிய பதாகைகளை ஏந்தி பாலக்காடு மாவட்ட அரசு மருத்துவமனை நோக்கி காங்கிரஸ் மகளிர் அணியினர் சனிக்கிழமை பேரணியாகச் சென்றனர்.