ஆயுள் பலம் அதிகரிக்க...

சுமார் 1400 ஆண்டுகளுக்கு மேலான பழைமையும், பல்லவர் கால கட்டடக்கலை நுணுக்கங்களையும் கொண்டது, திண்டிவனம் அருகேயுள்ள ஆலகிராமம் என்ற ஊரிலுள்ள அருள்மிகு ஸ்ரீ திரிபுரசுந்தரி உடனுறை எமதண்டீஸ்வரர் திருக்கோயில்.

- முனைவர் எஸ். பாலசுப்ரமணியன்

கல்வெட்டுகளில் இவ்வூர் 'ஆர்காமூர் பற்று' என்று குறிப்பிடப்பட்டுள்ளது.பல்லவர் காலத்தில் கட்டப்பட்டு, பிற்காலச் சோழர்கள், விஜயநகர மன்னர்களின் பங்களிப்பைப் பெற்ற இத்தலத்தின் வரலாறு, திருக்கடையூர் புராணத்தின் தொடர்ச்சியாக, ஈசன் எமதர்மனுக்கு அருளிய பெருமையைக் கூறுகிறது.

ஒருசமயம், தர்மப் பணிகளைத் தொடர முடியாமல் அவதியுற்ற எமதர்மன், பல தலங்களுக்குச் சென்று சிவலிங்கத்தைப் போற்றி வழிபட்டார். அவர் தொண்டி நதிப் பகுதியில் அமைந்துள்ள இத்தலத்துக்கு வந்து தவம் செய்தபோது, எமதர்மனின் தவத்துக்கு இரங்கிய ஈசன், அவரது பாவம் தீர அங்கேயே கங்கையை வரவழைத்தார் (இன்றும் இக்கோயிலின் எதிரே ஸ்ரீ கங்காதேவி அருள்புரியும் கங்கை குளம் உள்ளது).

எமதர்மன் அந்தக் கங்கையில் நீராடி ஈசனை வணங்க, சிவபெருமான் அவருக்குக் காட்சி கொடுத்து பாவம் நீக்கி, இழந்த 'தண்டத்தை' மீண்டும் அவரிடமே வழங்கச் செய்தார். எமதர்மனின் பாவம் நீங்கப் பெற்று, மீண்டும் தர்மப்பணிகளைச் செய்யத் தேவையான ஆற்றலையும் 'தண்டத்தையும்' வழங்கியதால், இத்தல இறைவன் 'எமதண்டீஸ்வரர்' என அழைக்கப்படுகிறார்.